كود سبور//

عبر ناصر لارگيط المدير التقني الوطني السابق والمدير السابق لأكاديمية محمد السادس لكرة القدم، على الفرحة ديالو بالتطور اللي وصل له المغرب فمجال كرة القدم، واكد ان هذه النتائج اللي حقق المنتخب المغربي خلال السنوات الماضي من بينها الوصول إلى نصف نهائي مونديال قطر، هو نتيجة عمل ومبادرة ملكية لتطوير المجال الرياضي وانتخاب مسؤولين زادو بالكورة المغربية للقدام ومن بينهم فوزي لقجع رئيس الجامعة الملكية المغربية لكرة القدم.

وهضر ناصر لرگيط فحوار مع موقع Footmercato الفرنسي، وقال: “فخور حيث كانشوف هذا الشي مستمر، وهذا الشي راه استثنائي، حيث كاين رئيس عندو طموح ومتبع الخدمة، وبدينا معه المغامرة عام 2014، ملي تنتاخب رئيس للجامعة الملكية المغربية لكرة القدم، وطلب مني نكون الديريكتور تيكنيك لمدة 5 سنوات، وخدمت معه، اليوم كاين جيل زوين فالكورة المغربية”.

وزاد وضح لارگيط وقال: “ملي مشيت بحالي عام 2019، قلت لكلشي ان المغرب عندو امكانيات، وشفنا النجاح اللي كان فقطر، واليوم ملي كاتشوف اللاعبين اللي عندهم دوبل ناسيوناليتي، بعدما كانوا مترددين يلعبو مع المغرب، ولاو دابا باغيين يلعبو معه، فهادي مؤشرات قوية بزاف، وكاتأكد الصحة المزيانة لكرة القدم المغربية”.

وكمل لارگيط: “كرة القدم المغربية كاتشعيش فترة ذهبية، وكل المؤشرات كاتقول ان هذا الشي غايستمر لسنوات جايا، من قبل كانت البنية التحتية عائق ولكن دابا البنية التحتية متوفرة وعلى أعلى مستوى وهذا الشي بفضل الملك محمد السادس والعمل ديال رئيس الجامعة الملكية المغربية لكرة القدم فوزي لقجع”.