كود – كازا ///

قالت يومية لاراثون الإسبانية، أن السيستم ديال المعابر الذكية في مليلية طاح أومپان بسباب الضغط ديال عملية مرحبا وكثرة الداتا اللي كتسجل ف السرڤيرات، واللي مرتبطة بخدمات خارجية بحال التطبيقات الذكية ديال الشرطة الوطنية الإسبانية.

وحسب الجريدة الإيبيرية، تسبب هاذ العطل التقني في تأخير وصول المهاجرين المغاربة اللي جايين من أوروبا للوجهات ديالهم. وقال مسؤول إسباني محلي، إن نظام المعابر الذكية خاص يتم تأجيل الخدمة بيه حتى تسالي عملية مرحبا 2024.

وعطى قائد قوات الدعم السريع في مليلية مثال باستقبال المعبر في الويكاند الأخير لحوالي 900 طوموبيل في أقل من 2 سوايع، وهو العدد اللي تجاوز أي توقعات. وتسبب في صفوف طويلة من الطوموبيلات والفترة ديال الانتظار لساعات داخل مرافق المعبر..