كود – باريس//

فـالانتخابات البلدية اللي دازت لبارح الحد ففرنسا، ربح المرشح ديال اليسار، إيمانويل غريغوار، رئاسة بلدية باريس، بعدما تغلب بفارق كبير على رشيدة داتي، اللي كانت مرشحة على حزب الجمهوريين ومدعومة من تحالف ديال أحزاب وسطية.

غريغوار جاب 53.1% من الأصوات، مقابل 38% فقط لداتي، فواحد النتيجة اللي كتبين تراجع واضح ديال اليمين فالعاصمة الفرنسية، أما المرتبة الثالثة فجات فيها صوفيا شيكيرو بنسبة 8.9% .

رشيدة داتي عبرات على خيبة الأمل ديالها، وقالت باللي النتيجة ماشي هي اللي كانت كتسنى، ولكن أكدت أنها غادي تبقى تناضل من أجل الباريسيين، وما غاديش تستسلم.

هاد الهزيمة كتعتبر ضربة سياسية لرشيدة داتي، خصوصا أنها كانت كتعول ترجع بقوة فالمشهد السياسي المحلي، فمدينة بحال باريس اللي عندها وزن كبير سياسياً.

من جهة أخرى، بعض الشخصيات اليمينية عبّرات حتى هي على الحزن ديالها من النتائج، واعتبرت باللي سكان باريس اختارو توجه آخر، أما اليسار شاف فهاد الفوز تأكيد على رفض الناخبين للسياسات ديال اليمين فالعاصمة.

الانتخابات البلدية ففرنسا شملات أكثر من 1500 مدينة، وكانت اختبار حقيقي للأحزاب قبل الانتخابات الرئاسية الجاية، وبيّنات باللي المنافسة مازال قوية خصوصا فالكبريات بحال باريس.

رشيدة داتي كانت قدمات الاستقالة ديالها من وزارة الثقافة قبل الحملة الانتخابية، باش تفرّغ لرئاسة بلدية باريس وخا هكاك، ما قدراتش تقنع أغلبية الناخبين وتحقق الفوز اللي كانت كتطمح ليه.