وكالات//

أكّد الرئيس الميريكاني دونالد ترامب فمقابلة صحفية جديدة باللي الصحة ديالو «ممتازة بزاف»، ورفض اللي سماه «التهويل الإعلامي» على الوضع الصحي ديالو، وقال باللي تركيزو كامل منصب على القيام بالمهام الرئاسية ديالو. هاد الكلام جا مع كثرة التساؤلات على صحتو، خصوصاً حيث ولى عندو 79 عام.

وكشف ترامب باللي كياخذ كل نهار جرعة ديال الأسبرين كتفوت الكمية اللي كينصحو بها الأطباء، وفسّر هاد الشي بأنها عادة قديمة عندو حيث كايآمن بضرورة بقاء الدم «خفيف» فالجسم. وقال حتى بللي هاد الشي كيسبب ليه مرات كدمات فديه، وسبق ليه حاول يخبّيهم بالمكياج ولا بالضمادات. وزاد وقال إن واحد منهم كان بسبب مصافحة مع وزيرة العدل السابقة بام بوندي، ملي ضرب خاتمها فإيدو.

وبخصوص الفحوصات الطبية، اعترف ترامب باللي ما دارش فحص الرنين المغناطيسي كيف ما كان صرّح من قبل، ولكن دار فحص بالأشعة المقطعية على القلب كإجراء احترازي، وأكّد باللي النتائج كانت عادية. ومن جهتو، خرج البيت الأبيض وطمّن الرأي العام مؤكداً باللي الرئيس كيتوفر على اللياقة الكاملة باش يقوم بالمهام ديالو، ونفى الإشاعات اللي كتقول إنه كيغفا فبعض الاجتماعات الرسمية.

وأوضح ترامب حتى أنه ما كيبغيش النعاس بزاف، وأن اللي كيبان فبعض الصور بحال إلى كان ناعس راه غير لحظات ديال ارتخاء كيريّح فيهم عينيه، وقال: «كنسدّ عيني شوية باش نرتاح، ولكن هما كيفسّروها بطريقة أخرى». وزاد بأن بزاف ديال الصور كتتشد فواحد التوقيت الغالط وكتعطي انطباع ماشي صحيح.

وفآخر المقابلة، رجع ترامب وأكّد على أنه باغي يبان بصورة رئيس نشيط وحيوي رغم تقدمو فالسن وقلة ممارستو للرياضة، باستثناء لعب الغولف وأكل الوجبات السريعة. ومع ذلك، كيبقى مصرّ على أن صحتو «مثالية»، وكيعتبر كل ما كيتقال عليها غير تشويش إعلامي ما كيأثرش على التزامو بأداء المهام ديالو.