كود الرباط//

كشفت صحيفة “تايمز تيش” بلي القوات المسلحة الملكية المغربية دخلات فشراكة استراتيجية مع الشركة الهندية “تاتا” لأنظمة الدفاع المتقدمة” باش يجمعو وينتجو المركبات المدرعة 8×8 فمدينة الدار البيضاء.

هاد المشروع غادي يكون أول مصنع كبير للدفاع فالمغرب وأول مصنع لشركة هندية خارج الهند.

المشروع غادي يوفر فرص شغل كثيرة للمغاربة لي غايخدمو فهاد المصنع، وغايوجدو فيه المركبات المدرعة باش يتستعملوها القوات المسلحة الملكية، وربما يصدروها لدول إفريقية أخرى.

المصنع غادي يبدا الخدمة فـ12 شهر الجايين، وغادي يستوردو بعض القطع من الهند ولكن غادي يكون حتى تصنيع محلي. الشركة ديال “تاتا” قالت بلي هاد الشراكة مهمة بزاف حيث غادي تساعد فبناء صناعة دفاعية فالمغرب وتفتح الأبواب لإفريقيا كاملة.

الوزير المنتدب المكلف بإدارة الدفاع الوطني عبد اللطيف لوديي قال بلي هاد المشروع خطوة استراتيجية باش المغرب يولّي يعتمد على راسو فمجال الدفاع، بحال اللي دار فصناعة السيارات.

الشركة غادي تخدم حتى مع الشركات المحلية، وتكون يد عاملة مدربة، وتضمن الجودة العالية فالإنتاج.

المدرعة 8×8 غادي يتم تصنيعها فالمغرب، وكتميز بتقنيات متقدمة وكتقدر تتكيف مع المتطلبات ديال الجيش المغربي.