كود -apnews //

علنت إدارة الغذا والدوا الأمريكية هاد ليام على توسيع الترخيص ديال دوا معروف اسميتو Addyi، اللي كيتشرب مرة فالنهار وكيستهدف نقص الرغبة الجنسية عند العيالات ،القرار الجديد ولى كيسمح باستعمالو حتى بالنسبة  للعيالات اللي دازو سن اليأس، بشرط ما يفوتوش 65 عام، بعدما كان مقتاصر قبل غير على اللي مازال ما وصلوش لهاد المرحلة.

هاد الدوا كانت تتعوّل عليه بزاف الشركات ينجح فمجال صحة المرأة، حيث كيعالج حالة معروفة بقلة الرغبة الجنسية اللي كتخلّي بزاف عيالات يحسو بالضغط النفسي وعدم الارتياح. Addyi كيخدم على مواد كيميائية فالدماغ مرتبطة بالمزاج والشهية، ولكن النتائج ديالو كانت محدودة وما وصلش للمبيعات اللي كانت متوقعة.

وخا التوسيع فالفئة العمرية، مازال الهضرة  دايرة على  هاد الدوا بسبب الآثار الجانبية ديالو، بحال الدوخة والغثيان، وزيد عليها تحذير  من شرب الشراب معاه حيث يقدر يهبّط الضغط بزاف ويوقع الإغماء. النشرة الطبية كتوصي بلاش منو  إلا كان الطاسة غادي تكون قبل منو ولا موراه.

من جهة أخرى، بزاف ديال الأطباء والباحثين كيشوفو باللي نقص الرغبة الجنسية ماشي ديما مشكل طبي، وكيكون مرتبط بعوامل نفسية واجتماعية وزوجية، خصوصاً من بعد سن اليأس. وكيشددو باللي قبل ما يتوصف أي دوا، خاص يتدار تقييم شامل للحالة، حيث ماشي كل مشكل عندو حل دوائي.