الرئيسية > كود سبور > كيليان مبابي: ماشي بعيد واحد النهار نصدق فريال مدريد
25/05/2022 05:00 كود سبور

كيليان مبابي: ماشي بعيد واحد النهار نصدق فريال مدريد

كيليان مبابي: ماشي بعيد واحد النهار نصدق فريال مدريد

كود سبور – وكالات //

وخا يلاه جدد الكونطرا مع باريس سان جيرمان، قال المهاجم الفرنسي، كيليان مبابي، بللي ممكن شي نهار مستقبلا يمشي لريال مدريد.

وسينا كيليان (23 عام) كونطرا جديد لمدة 3 سنين مع فرقتو ال”PSG”، وخا كانت أوفر كبيرة من ريال مدريد الإسباني، وهادشي علاش فاللخر كعاو بزاف الناس ديال النادي الصبليوني.

واعتابر المهاجم الشاب بللي الحلم ديالو فالالتحاق بريال مدريد مازال هو هو، وماشي شي حاجة مستبعدة فالكاريير ديالو مستقبلا.

وفتصريح ل”بي بي سي سبورت” كَال مبابي: “شكون عارف أشنو ممكن يوقع فالمستقبل؟ أنا دبا ماكنفكرش فاللي جاي. كنفكر فالحاضر وصافي. و اللي كاين هو أنني سينيت مع باريس سان جيرمان كونطرا جديد ديال 3 سنين”.

ومن بعد سؤالو على واش هاد التجديد اللي سينا الويكاند الفايت كيعني بللي الحلم ديالو فاللعب مع ريال مدريد تبخر ومابقاش منو؟، جاوب مبابي بشكل واضح: “لا جامي”.

وكانو مسؤولين فالبطولة الإسبانية “لاليكَا” اعتارضو بقوة على الصفقة ووصفوها ب”الفضيحة”.

وجا فبيان ديال “لاليكَا”: “هاد النوع من الاتفاقات كيهدد الهوية الاقتصادية للفوتبول فأوروبا”.

وفايت أيضا كيليان مبابي صرح بللي اتاصل برئيس ريال مدريد، فيورنتينا بيريز، وعلمو شخصيا بالقرار ديالو حتى قبل ما يمدد الكونطرا مع باريس سان جيرمان.

موضوعات أخرى

24/06/2022 23:00

الأحرار دار بيان تحطات فيه النقاط على الحروف فأحداث مليلية الخطيرة.. تضامن مع الضحايا والجرحى وتنويه بمهنية القوات العمومية وتأكيد على الاعتزاز بالشراكة بين المغرب وإسبانيا