كود الرباط//
وجه الفريق الاشتراكي بمجلس المستشارين، نهار الثلاثاء 13 ماي 2025، سؤال شفوي مستعجل لكاتب الدولة المكلف بالتجارة الخارجية، كيستفسرو فيه على الإجراءات اللي ناوية الحكومة تديرها فحق شركة أجنبية عرضات خريطة المغرب مبتورة فمحلاتها فكازا.
المستشار يوسف أيني، عن الفربق الاشتراكي، اللي تكلف بطرح السؤال، تساءل: “شنو هي الإجراءات والتدابير العاجلة اللي غادي تديرها الحكومة لمواجهة هاد الفضيحة؟”، خصوصاً فظل التكرار ديال هاد النوع من الانزلاقات من طرف شركات أجنبية.
السؤال ترفع لرئاسة المجلس، باش يتم إحالته على كاتب الدولة المعني بالأمر، اللي منتظر يعطي توضيحات فجلسة قادمة بمجلس المستشارين.
هاد الخطوة جات بعدما نشر موقع “شوف تيفي” فيديو كيوثق لمحل تابع لسلسلة “LC Waikiki” فكازا، اللي كان فيه عرض لمنتوج فيه خريطة للمملكة المغربية من غير الأقاليم الجنوبية، فخرق سافر للسيادة الوطنية.
