محمد سقراط-كود///
هاديك أمريكا لي كنا كنخرجوا ضدها في المظاهرات وحنا كنغوتوا أمريكا أمريكا عدوة الشعوب، وساط باط ميريكان تحت السباط، وهاد المظاهرات كانوا دعما لصدام المجرم القتال لي خرب بلادو ودمرها وقتل شعبو وكلخهم ونهب ثرواتهم، وفي الوقت لي الكويت گالسين كيسخبوا الجنسية من الجيل التاني والثالت لمواطنيهم بسبب ان جدودهم من بلاد خرى او قبيلة جنبهم، أمريكا كتبقى من الدول القليلة في العالم بالاظافة الى أوروبا أو الغرب الكافر حسب اللحايا، لي يمكن لمهاجر يالله حطو الكار ياخد الجنسية ويترشح في الانتخابات وينجح ويولي حاكم لأكبر الولايات في العالم بحال آرنولد في كاليفورنيا او عمدة أهم مركز مالي عالمي بحال زهران محمداني في نيويورك.
مهاجرين مغاربة كثار في أوروبا شاركوا في الانتخابات وتقلدوا مناصب كبيرة بينما مكاين حتى مهاجر أجنبي في المغرب شارك في الانتخابات ونجح وسير شي مدينة، كيف ما كنفتاخروا فاش كيولي عمدة شي مدينة في بلجيكا او هولاندا مغربي خاص يجي النهار فين يولي عمدة كازا من أصول سينغالية أو إيڤوارية وعلاش لا يكون مسيحي او يهودي أو حتى وثني، هاد الغرب لي كنضلوا نسبوا فيه ونتاقدوه ونوصفوه بالايسلاموفوبيا راه بين لينا شحال من مرة أنه رحيم وعطوف وكيتقبل الآخرين، وحتارم غير القانون يمكن تمشي بعيد في البلاد وتولي شنو مابغيتي، يكفي فقط تشوف السهولة كيفاش ممكن تاخد الجنسية في أوروبا وتقارنها بصعوبة الحصول على الجنسية المغربية، راه بحال الى جنسية الجنة، بلا منهضروا على النجاح الاقتصادي والدراسي، حنا راه لحد الان هاد الافارقة جنوب الصحراء لي خايف منهم بنادم وكيضل يغوت عليهم، راه كتلقاهم غير في المهن ديال تمارة والتكرفيص وفي أوضاع خارية عليها.
شوف غير خوتنا العرب والمسلمين كتلقى مغاربة فناو عمرهم تما وحتى الجنسية عمرهم يحلموا بيها، مابقى غير يديرو كاريير سياسي، الدولة الوحيدة لي نجحوا فيها المغاربة ووصلوا للرئاسة هي الجزائر وفي اللخر جازاتنا بالمسيرة الكحلة، عظمة أمريكا وأوروبا راه كتجلى في هاد الفكرة ديال انهم أرض الفرص ومفتوحين لأي واحد يمكن يجرب راسوا فاش يوصل، وسقف الطموحات غير محدود راه ايلون ماسك اغنى واحد في العالم وغير مهاجر في أمريكا، على عكس هاد الدول لي كتغنى بأنه كيجمعها العرق والدين وتنتمي لأمة واحدة، كتلقى راسك الى هاجرتي ليهم عندك مسار واحد مرسوم وهو خماس واخا تدير لاباس يقدر يجي واحد النهار يحيدو ليك الجنسية ويجريو عليك بحال لي كتدير الكويت دابا، هاعلاش المغرب خاص يكون الاستثناء ويستافد من الهجرة بحال كيف مستافدة منها أوروبا وامريكا.
