الرئيسية > آراء > كيف ما كاينة حرب على الهجرة السرية أو حرب على المخدرات خاص حرب حتى على جنوح القاصرين.. مايمكنش تقبل الدولة والشعب سيطرة القاصرين على الشارع بهاد الشكل، سواء من قلة الترابي والتحرش وكاع الكوارث، وصولا للسرقة والكريساج والقتل
13/10/2020 18:00 آراء

كيف ما كاينة حرب على الهجرة السرية أو حرب على المخدرات خاص حرب حتى على جنوح القاصرين.. مايمكنش تقبل الدولة والشعب سيطرة القاصرين على الشارع بهاد الشكل، سواء من قلة الترابي والتحرش وكاع الكوارث، وصولا للسرقة والكريساج والقتل

كيف ما كاينة حرب على الهجرة السرية أو حرب على المخدرات خاص حرب حتى على جنوح القاصرين.. مايمكنش تقبل الدولة والشعب سيطرة القاصرين على الشارع بهاد الشكل، سواء من قلة الترابي والتحرش وكاع الكوارث، وصولا للسرقة والكريساج والقتل

محمد سقراط-كود///

جوج جرائم قتل بسباب الكريساج فيوماين وحدة في طنجة ووحدة فكازا، في طنجة قاصرين وقفو على شاب دركي يالله بادي حياتو تقاتل وتقاتلو معاه واليديه حتى كبر وقرا وخدم، في اللخر يموت مغدور من طرف براهش ولاو غالبين بلاد على قدها ومابقى حد عندو سيطرة عليهم لا واليديهم لا الدولة، مكيخلعهم حبس مايخلعوهم محاكم، ماباغين يخدمو ماباغين يقراو، باغين تيماكس وفيديوات تيك توك والمريول والمريولة، وكالسين يدورو ويكشطو في عباد الله فاي درب وأي زنقة، البلاصة فين مات الدركي في طنجة راه شارع رئيسي كبير رابط بين المدينة وبوخالف والمطار، وتعرضو ليه قبالت بيت الصحافة، شحال من واحد غادي يقول مكانش عليه يقاوم، ولكن راه رزقك عرقتي ونشفتي عليه والوراق ديالك ويوقف عليك برهوش يكشطك هكاك عين بين ويزيد وسير قيد شكاية ضد مجهول، راه ملي كيقاوم كاع الواحد مكيظنش أنه غادي يتعرض للقتل ولكن كيقول راه يمكن يصوفي راسو وينقذ الكبرياء ديالو، وللأسف دابا مابقاتش كافية هاد البراهش غير السرقة ولاو خاصهم يضربو ويخصرو ويقتلو، لانه مكاينش شي رادع حقيقي ليهم.

البوليس كيتكرفصو باش يشدو شي قاصر مجرم وفاللخر ملي كيقدموه للمحكمة كتدوز شهور قليلة كيلقاوه عاوتاني في الشارع مرونها وصح وأخطر من اللول، ويعاودو معاه نفس المسطرة ويعاود يخرج عاوتاني مجرم كثر ملي كان، كاين عرام ديال القاصرين عندهم كثر من تلاتة ديال الشدات وربعة وهوما باقي ماوصلو حتى لتمنطاش لعام، وطبعا في كل شدة تلقى مو وختو تابعينو بمالذ وطاب ويرغبو ويزاوكو عليه ويديروليه محامي، والى كاين ليمن يخلصو باش ينقصو ليه يبيعدو ذهبهم عليه، وكل مرة هاكة كاع المناتف اللولين ديال البرهوش كيدوزو بحال شي عطل مدفوعة الأجر، واكل شارب ناعس لابس والروشارج من لفوق باش يعيط للمريولة، كيبقى داخل خارج حتى يدبر على شي رويحة ويسكن في الحبس، الموشكيل هو هاد الرويحة كيكون مواطن صالح نافع راسو وعائلتو وبلادو وكيمشي هباء منثورا.

كيف ما كاينة حرب على الهجرة السرية أو حرب على المخدرات خاص حرب حتى على جنوح القاصرين، مايمكنش تقبل دولة وشعب سيطرة القاصرين على الفضاء العام بهاد الشكل، سواء من قلة الترابي وعدم الإحترام والتحرش وكاع الكوارث، وصولا للسرقة والكريساج والقتل، بما أنه المغرب معندوش الإمكانيات ديال يوليو عندو حباسات بحال ديال النرويج لي كيأهلو السجين بصح ولكن كيتقام غالي بزاف والمغرب عمرها تكون عندو هاد الإمكانيات، فعلى الأقل يولي الحبس رادع والقوانين أيضا، قاصر تشد بجوج جنح إلى عاود التالتة يمشي بعشرين عام، باش ماتبقاش هاد الخيطي بيطي للحبس تلقى الواحد يالله دار عشرين عام وهو عندو خمسة دالشدات وكثر، وطبعا وأهم حاجة هو تمنع الزيارة والكارو في الحبس ولي بغا يزور شي مسجون يجيه طويلـ وراه حتى هادشي ماشي حل طبعا ولكن على الأقل الضحايا وعائلاتهم غادي يكونوا مرتاحين ملي يعرفوا ان الناس لي تكرفصو عليهم راهم مكرفصين في الحبس ماشي منشورين فيه بحال شي اوطيل.

موضوعات أخرى

31/10/2020 19:30

واش مابقى أمل باش تعتق المدينة من كورونا.. الطبيب حمضي: الوضع الوبائي فكازا تفاقم والحجر والتدابير ماكافياش للأسف.. وغالبا التلاميذ غيرجعو للتعليم عن بعد مور العطلة

31/10/2020 19:00

ماكرون للجزيرة: حنا ضد معاداة السامية والمسلمين وجميع أشكال العنصرية ضد الشعوب.. لكن فالمقابل مع السخرية من الديانات بما فيها اليهودية والمسيحية وهذشي نوع من حرية التعبير.. وأزمة الإسلام كاينة بسبب الإرهاب والفكر المتطرف

31/10/2020 18:30

الطبيب حمضي: المغرب غيدخل فموجة ثانية دالوباء وغايتزادو الموتى والإصابات.. والقاضية غتحماض كثر مع الانفلونزا والالتهابات.. وها شنو خص يدار لتفادي انهيار المنظومة الصحية

31/10/2020 18:00

الروس ما راضيينش على القرار ووصفوه بالمتحيز وقالو ان تداعياتو غادي تكون سلبية وفيه احتكار ولغتو طمسات معايير متفق عليها

31/10/2020 17:30

حصيلة كورونا اليوم.. 3790 مغربي ومغربية تقاسو و70 ماتو و3350 تشافاو.. الطوطال: 219084 إصابة و3695 وفاة و181275 حالة شفاء.. و34114 كيتعالجو منهم 814 فحالة خطيرة