كود سبور//

فضلت عدد من المنتخبات الأفريقية مرة اخرى تلعب الماتشات ديالها خلال التوقف الدولي المقبل بالمغرب، وخدات الموافقة من عند الجامعة الملكية المغربية لكرة القدم باش تلعب فالتيرانات المغربية.

ويتعلق الأمر بمنتخب بوروندي اللي غايلعب ضد غينيا بيساو يوم 6 يونيو 2025 فتيران برشيد، والگابون ضد زامبيا فنفس اليوم فتيران الاب جيگو، والسودان ضد زامبيا حتى هما نفس اليوم فتيران برشيد، وموريتانيا ضد افريقيا الوسطى نفس اليوم فتيران العربي الزاولي، وبوركينافاسو ضد زيمبابوي نفس اليوم فتيران البشير فالمحمدية.

ولاعبين الگابون ضد غينيا بيساو يوم 9 يونيو 2025 فتيران البشير بالمحمدية، وتونس لاعبين ضد زامبيا فتيران العربي الزوالي يوم 10 يونيو 2025، ونفس اليوم لاعبين فيه النيجر ضد زيمبابوي فتيران الاب جيگو، والسودان لاعبين ضد افريقيا الوسطى فنفس اليوم فتيران برشيد، وبورندي لاعبين ضد موريتانيا حتى هما يوم 10 من نفس الشهر فتيران البشير بالمحمدية.

هاد المنتخبات توفرت لهم كل الظروف باش يلعبو الماتشات ديالهم ويكونو مرتاحين من لوطيلات وطروسبور، وملاعب تداريب وغايترينيو فلانوريا بالمحمدية، وكهرما ولانيكس ديال مركب محمد الخامس، ويلنيس ديال الوداد ولاكاديمي ديال الرجا.