كود الرباط //
كيف توقعات ونشرت “كود” لبارح، حسن عبقري المدير العام لميناء طنجة المتوسط طار رسميًا من منصبو، بعدما اجتمع المجلس الإداري ديال طنجة ميد، البارح الخميس، بشكل مستعجل.
هسبريس نشرات اليوم بلي القرار ديال الإعفاء تخاذ ف اجتماع رسمي ومستعجل دارو المجلس الإداري ديال طنجة ميد، بسباب تأسيس عبقري شركة استشارية فمدينة فالنسيا الإسبانية، كتوفر خدمات فتدبير الموانئ، وهو ما اعتبره المجلس “سقطة كبيرة” ما يمكنش يتقبلها، حيث كاين تعارض مصالح واضح مع المنصب اللي كان كيشغلو.
عبقري اللي كان واحد من مهندسي نجاحات ميناء طنجة المتوسط، لقى راسو فموقف صعب، والآن تسندت المهمة مؤقتًا لإدريس العربي، فانتظار ما ستكشف عنه التحقيقات اللي تحلات فهاد القضية. وفق هسبريس.
وحسب مصادر “كود” فإن هاد الفضيحة دارت روينة وسط المجلس الإداري لمجموعة طنجة المتوسط،، وكذا مجلس الرقابة لي فيها وزير الداخلية عبد الوافي لفتيت، ووزير المالية نادية فتاح علوي، ووزير الصناعة والتجارة رياض مزور، ووزير التجهيز والماء نزار بركة، ومسؤولين اخرين.
رابط توقع “كود” للإعفاء:
توقع.. مدير طنجة ميد المتوسط غايطير بسباب فضيحة تضارب المصالح بتأسيس شركة ف ميناء فالنسيا
