كود علي الصافي العيون ///

كنشوف اسبوعيا برنامج “جو شاو”. كنت كنشوفو باش كان على يوتوب وكان اسمو “جوتوب”. من بعد جات قطر فاطار دعمها للاسلام السياسي والاخوان فمصر واستقطاب كاع اللي يقدر يكون حليف ليهم بعد استيلاء الجيش على السلطة فانقلاب طاحت فيه رواح كثيرة فميدان رابعة.

جا السيسي بالدبابة وخدا السلطة كعسكري بعد ما طيح الرئيس محمد مرسي ديال الاخوان المسلمين. هادي قضية مصرية مصرية ما كتهمناش. كاينين معتقلين سياسيين كاينين. كان العنف كان. واش الاخوان كانو انبياء٬ ابدا عندهم تاريخ دموي وما عمرهم امنو لا بالديموقراطية لا بحقوق الانسان. كيأمنو بولاية الفقيه وبمصطلحات عمرها 14 قرن باش يحكمو. 

نعرفو لموضوعها بعد هاد القوس. باش ولى هاد “جو شاو” مع قطر. بدا كيتبث من قنانهم “العربي”. فاللول كانت الحلقة ديالو كلها اللي فيها شي 45 دقيقة مخصصة بالكامل لمصر. لمهاجمة السيسي للتهكم عليه. لضربو. لضرب مصداقية اي نشاط كيديرو. من بعد زاد شي فقرات كتهم دول عربية. ديما كيراعي مصالح قطر الخارجية طبعا. مالين لفلوس.

لكن من خلال متابعتي لتغطيتو “الساخرة” احيانا و”الباسلة احيانا اخرى” بديت كنشوف اش كيدير السيسي. حقاش ما كنتابعش قنوات مصر. ما كنشوفش اش كيدير هاد الرئيس. فقط من خلال برنامج ساخر يستهدف السيسي ونظامو وليت معجب بكل ما يقوم به السيسي. ما ينجزه لبلدو. بتحركاتو. بتدشيناتو. بطريقة خدمة صورتو. 

هاد المعارض ولى فالحقيقة مدافع على السيسي بلا ما يعيق. الاصرار على كل حلقة يكون فيها السيسي عطات نتيجة عكسية. 

دابا خلاني نشوف انشطة اخرى كيديرها هاد الرئيس. لقاءاتو مع رجال الاعمال. احراجهم باش ينجزو مشاريع ضخمة فوقت قياسي وبثمن معقول. كيدعم المنتوج المصري. طلق السياحة فكوفيد وما دارش بحالنا باش سدينا حدودنا. سياحتهم مزيانة دابا. جابت للخزينة ف2021 قرابة 12 مليار دولار. صناعتهم غادية مزيان. كاع المشاريع لكبيرة الضخمة كديرها شركات مصرية محلية. 

طبعا حتى زين ما خطاتو لولة. كاين امور كثيرة خاصها تقاد. اهمها انهاء الاعتقال السياسي. ولكن السيسي كيدبر بلاد كبيرة فظرف حساس ومزطط راسو

عجبني اكثر كيف دار مع الرئيس الجزائري اللي زارو. ما خرج بوالو من عندو بل بهدلو باش خلاه يدير الورد لضريح الرئيس الراحل انور السادات. اول واحد بدا بالتطبيع مع اسرائيل. رسالة واضحة من مصر لنظام العسكر الجزائري. 

وفوق هاد الشي مصر علنات وهاد تبون عندها باللي مع مغربية الصحرا. هادي ضربة كبيرة للجارة الشرقية

المهم ان هاد “جو شاو” خلاني نكون معجب بالسيسي. مصر غادية تكون احسن معاه كيف كانت مع الراحل مرسي اللي بقى في باش مات فالسجن بعد ما تحكم عليه