كود هناء ابو علي ///

ناصر بوريطة وزير الخارجية والتعاون واللي زادوه المغاربة المقيمين بالخارج مع خالد ايت الطالب وزير الصحة والحماية الاجتماعية كانو ضد فتح الحدود فاول فبراير. رجعو لخطاباتهم لتدخلاتهم فالبرلمان ولحواراتهم باش تأكدو من هاد الشي.

هاد الجوج ما بغاوش يتفتحو الحدود واخا المبررات غبية وواهية. اوميكرون ماشي متحور خايب من كورونا. الحالة الوبائية بالارقام مزيانة. نسبة ملء اسرة الانعاش حتى البارح وحنا فالدورة كيف قالت وزارة الصحة براسها٬ يالله 14 بالمائة بينما كانت 52 بالمائة فشهر يوليوز مع المتحور دلطا وكنا فاتحين الحدود.

لكن اش وقع من البارح للصباح حتى العشية باش يتقرر اعادة فتح الحدود واعلان تاريخ واضح اللي هو 7 فبراير؟ قبل من تقديم معطيات تعاونا على الجواب٬ خاص الاشارة ان هاد التاريخ بعيد. ما يمكنش تسد ف48 ساعة من اعلان القرار وتفتح الحدود بعد 12 يوم من الاعلان على هاد القرار. هاد الشي حتى هو داخل فهاد التدبير الكارثي لهاد الملف.

البارح كان نشاط يبدو هو اللي عجل بنشر بيان الحكومة٬ وهو ترؤس رئيس الدولة ببنسليمان ل”حفل إطلاق أشغال إنجاز مصنع لتصنيع اللقاح المضاد لكوفيد-19 ولقاحات أخرى”.

استثمار يقدر يوصل ل500 مليون اورو وفيه غادي يكون “مصنع لتصنيع وتعبئة اللقاح (المضاد لكوفيد ولقاحات أخرى”. انتاجهم غادي يوصل ف2024 لإنتاج 116 مليون وحدة. انتاج عبوات تجربيبية غادي يبدا ف30 يوليوز من العام الجاي.

هاد “سينسيو فارماتيك” غادية تولي من اكثر 5 منصات فالعالم باش يسالي بناءها.

طبعا التدشين كان ملكي. جا وحضر وكان موكب من لماطر والناس كتسنى باش تشوف ملكها والوزرا وقعو وتعلن على انطلاق اشغال انجاز المصنع٬ يعني هاد الشي كيبين باللي الحياة بدات ترجع لسابق عهدها. ان كورونا ماشي كيف كيصورها ليها ناصر بوريطة وايت الطالب.

الملك بهاد التدشين ضرب تبريراتهم الغبية فالزيرو. بين باللي خاص المغرب يفتح حدودو. اصلا هاد المشروع الضخم راه شراكة مع شركة سويدية وهاد الشركة راه جا ممثلها للمغرب وحشومة انو يدخل فطيارة لبلاد طالقة هاد المشاريع وهو جاي فطيارة خاصة ويشوف هاد الحدود مسدودة. كيفاش يمكن يغطي هاد المصنع لكبير 60 بالمائة من حاجيات افريقيا من اللقاح فبلاد سادة حدودها.

طبعا بعد ما شافت الحكومة هاد النشاط٬ اكيد تقرر الاعلان عن تاريخ لفتح الحدود