كود الرباط //

أجرى رئيس مجلس المستشارين، النعم ميارة، اليوم الثلاثاء بأبوظبي مع رئيس المجلس الوطني الاتحادي بدولة الامارات العربية المتحدة، صقر غباش، لتكريس وجهات النظر والتعاون بين المؤسستين. هادشي كولو مزيان فاطار الدبلوماسية الموازية.

الغريب حسب مصادر برلمانية، هو أن ميارة دا معه وفد مافيه حتى مرا وحدة، وفين المناصفة وفين المساواة، للي غير مؤخرا احتفل بموظفات مجلس المستشارين لي هوما كثار بزاف، وقال بمناسبة 8 مارس “اليوم ليس احتفالا بل من أجل الوقوف على قدرتنا على انطلاق تكافؤ الفرص”. دبا مع هاد الوفد لي دا مكاين لا تكافؤ فرص ولا مساواة ولا مناصفة.

واش لهاد الدرجة المستشارة البرلمانية ما عندها قيمة عند هاد المكتب، لي باين بهاد الخطوة كيتناقض مع مساعي الدولة نحو تمكين المرأة في العمل السياسي والاجتماعي والحكومي.

قبل أيام المندوب السامي للتخطيط أحمد الحليمي، انتقد بشدة وضعية المرأة في المغرب، واخا كتشكل تقريبا 40 في المائة من أطر القطاع العام. بل شدد بلي هاد باقي كاين غياب المساواة بين الرجل والمرا فهاد البلاد.

هادشي لي دار ميارة دليل قاطع على تغييب المساواة في تمثيلية الدبلوماسية البرلمانية.
من غير هادشي زاد ميارة دار خطأ ف البروتوكول وحضر معه فاجتماع رسمي مدير الديوان، للي ديما معمرو كيحضر ف الاجتماعات الرسمية والمهام ديالو معروفة.