كود نيوجرزي ///

بحال حلم تحولات بلادنا من دولة تحلم تلعب مع البرازيل وباش تخسر ب3 معاها كنفرجو ونلقاو كاع مبررات العالم لتبرير الهزيمة، لدولة يخرج رئيس البرازيل يقول باللي يتمنى يربح المغرب.

بين هاد الفترتين اي من 1998 لليوم تغيرات بلادنا. تغيرات الكورة اكثر فالسنوات الاخيرة. ولات كلمتها مسموعة مع وصول فوزي لقجع لرئاسة الجامعة. تغيرات عقلية المغربي. من عقلية مشارك لعقلية باغي الكاس گالا

اليوم 13 يونيو 2026 بنيوجرزي فامريكا وبمناسبة اول ماتش عن مجموعة بلادنا ضد بلاد الكورة ضد البرازيل كيعكس هاد التحول.

البرازيليين اللي تلاقاتهم كود فمول “اميريكان دريم” حدا التيران خايفين. مخلوعين من فرقة “حكيمي”. لهاد اللعاب فضل كبير فالتحول. مغرب بلا عقد نقص. بلا خوف. داخل باش يربح.

عقلية أسس ليها فوزي لقجع. هادي سياسة بداها سيدنا من نهار وصل فقطاعات كثيرة ولكن ما لقاش ديما رجالة يطبقوها. فالكورة وبعض القطاعات لقلال نجحو ينزلوها

تصورو اكبر مولات ميريكان فيها العيطة و”ها اللاواه يا للاواه” والأغاني المغربية. فطوابق هاد المول حيحة مغربية حقيقية.

كنا نتفرجو قبل فالبرازيل وغيرها دابا هما ولاو يتفرجو فينا. تحول كبير بزاف. بلاد تايقة فراسها. فقدراتها. كتلعب على الكاس ماشي على المشاركة