كود الرباط//

فالوقت لي كاين شلل فالكليات ديال الطب والصيدلة بالمغرب لي تابعا للقطاع العام، كتعيش كليات الطب والصيدلة فالبريفي أجواء عادية وكولشي كيقرا ويدوز الامتحانات بشكل عادي.

الإضرابات المستمرة لطلبة الطب المتضرر الأول منها هو الدولة والقطاع الصحي للي محتاج موارد بشرية كثيرة لتنزيل التغطية الصحية، ولكن المستفيد الأكبر هو البريفي والمستثمرين فهاد الكليات الخاصة من كبار النافذين والشخصيات للي عندها لوبيات قوية ونفوذ فكاع المجالات.

حسب مسؤول حكومي لـ”كود” فراه المستفيد الحقيقي اليوم هو القطاع الخاص “التعليم العالي الخاص” ف تخصصات الطب والصيدلة وطب الأسنان، كولشي فرحان بقرار تقليص سنوات الدراسة وخدامين على التكوين وساكتين، فالمقابل كاين تحريض غير مفهوم من طرف “صحاب المصالح” بتحالف مع الاسلاميين لي خدامين مزيان بهاد الضوسي باش يبقا الاضراب مستمر.

فكليات الطلب والصيدلة الخاصة، ديال صحاب الفلوس، الدراسة 100 في المائة والتكوين 100 فالمائة، كولشي ناضي، هادو فرحانين بزاف حيث العمومي لي كتخلص عليهم الدولة مكيقراوش ودايرين اضراب عام وهادشي كيدفع بعدد من الأسر تفكر مشي للقطاع الخاص وتخلي العمومي حيث كافيهش استقرار.

مسؤول حكومي أكد لـ”كود” بلي الامتحانات المقررة يوم غد الجمعة 4 أكتوبر مغاديش تأجل واللي مجاش يدوز غايجيب صفر وبالتالي السقوط، واللي سبق عاود شي عام كيعني الطرد، مشددا بلي مكايناش سنة بيضاء.

يشار بلي أكبر اضراب عرفو شي قطاع فالمغرب، هو هاد اضراب طلبة الطب لي فايت 9 شهور، عام مشا، ورافضين اي صيغة جديدة للتوافق واخا جاتهم صيغة مزيانة من مؤسسة الوسيط، لكن رافضينها حيث متمسكين بمطلب الدراسة ف7 سنوات بلاصت ست سنوات لي قررت الدولة.

كاينا حملة قوية من الإسلاميين باش طلبة الطب يبقاو فالاحتجاجات ويهزمو الحكومة، حيث بالنسبة ليهم هادو وقود لمعاركهم ضد الدولة، ولكن للي غريب هاد المرة هو التحالف بين الاسلاميين وصحاب الفلوس للي باغين ولادهم يكملو القرايا ف فرنسا باش من بعد يديرو كلينيك فالمغرب ويگزرو فالمغاربة، وزيد عليهم الگزارة فالقطاع الخاص أطباء ملايرية داعمين احتجاجات الطلبة.

كاين تحالف بين الملايرية و”الگزارة” فالطب الخاص مع الخوانجية ضد “سيادة” التكوين الطبي المغربي وضد يبقاو الأطباء فالمغرب كيعالجو خوتهم فطاطا واولول وزحيليكة واملشيل وغيرها من المناطق لي مخداتش حقها لا فالتنمية لا فالصحة ولا فوالو. فسياق كتعيش فيه الاحزاب السياسية صراعات على المناصب والمكاسب ومخلية المؤثرين واللحايا يأثرو فهاد الملف بصورة خايبا فالسوشل ميديا.

كاين عصيان كبير ضد القرار السيادي للدولة، المتعلق بتقليص سنوات الدراسة مع تكثيف سوايع التداريب والتكوين يعني الخدمة وتمارة باش يخرج طبيب مقاد.