كود علي الصافي طنجة ///

https://web.facebook.com/watch/?mibextid=wwXIfr&v=739507685418522&rdid=SE3u9UWq7JWObQhq

يونس التازي والي طنجة تطوان الحسيمة تالف هاد ليام. فضيحة طلقو واخرى تشدو. حديث طنجاوا اليوم هي فضيحة ساحة فارو المعروفة بطنجة بساحة المعگازين. فضيحة كشفات عجز الوالي على تنزيل مشاريع تأهيل مدينة طنجة استعداداً للمواعيد القارية والعالمية للي غادي تعرفها بلادنا بحال كأس أفريقيا هاد العام وكأس العالم ف2030.

كلشي بدا بعد الاحتجاجات لكبيرة للي داروها ناس طنجة على رداءة اشغال تهيئة سور المعگازين، لقى الوالي التازي راسو مجبر باش يعاود الاشغال وهذا اعتراف صريح بللي الاشغال كانت فالصو. اعتراف بللي هاداك الشي اللي كان دارو خايب.

حسب ما تجمع ل”كود” من معطيات، فبعد ما بغى التازي يغطي على فضيحتو سرب معلومة مفادها باللي تم بإعفاء المهندس المسؤول على هاد الاشغا. حسب تحريات “كود” هاد الشي كذوب وباش يبعد منو المسؤولية.
علاش؟

الحقيقة للي باغي يخبيها الوالي التازي، توضح مصادر “كود”، هو ان هاداك المهندس المعماري من كازا. كيخدم فمشاريع عقارية بعدة مدن منها طنجة. واضافت مصادر “كود” باللي هاد المهندس دار جيست بينيڤول وقدم ماكيط ديال المشروع للوالي التازي للي ڤاليداه. بعد الموافقة بدات الشركة الفائزة بالصفقة الأشغال ديالها.

باش نزيدو نقدمو ليكم الدليل على كذبة اعفاء المهندس، تضيف مصادر “كود”، راه باش كانت الاشغال كان الوالي التازي كيزور ساحة المعگازين وكان عاجباه الأشغال، فما يمكنش اليوم نقلبو على كبش ضحية نمسحو فيه هاد الفضيحة.

“كود” تقدم دليل اخر على تناقض الوالي فهاد لفضيحة، فنهار بدا الغضب الشعبي وقررو طنجاوا يديرو وقفة احتجاجية، تم تعميم توضيح باسم الولاية بللي الأشغال مازال ماسالاتش وباللي تم توقيفها بسباب عطلة لعيد لكبير باللي غادي يتم استئنافها من بعد عطلة العيد، لكن اليوم، تؤكد مصادر “كود”، باللي اشغال التهيئة غادي تتعاود من الزيرو. كلشي كلشي. شفنا الرخام طار والأرضية تقلعات. وهذا كيأكد ان احتجاجات الساكنة كانت على حق، توضح مصادر “كود”.

دابا اليوم طنجاوا صبحو خايفين على مدينتهم بسباب غياب الجمالية وانعدام جودة الأشغال للي كتعرفها المدينة فعهد هاد الوالي اللي سميتو التازي

طنجاوا اليوم كيتمناو زيارة سيدنا لطنجة للي ديما عزيزة عليه، باش المسؤولين ديالها يجمعو راسهوم وينوضو يخدمو