كود كازا ///

قيادي فحزب العدالة والتنمية واحد معارضي المجلس الحالي للدار البيضاء خدم صورة قديمة باش يضرب عمدة المدينة التجمعية نبيلة الرميلي. الصورة فيها الرميلي مع وزيرة النقل الاسرائيلية ميري ريغيف. هاد المسؤول عارف باللي ماشي صورة جديدة وسوقها بهدف ضرب صورة العمدة.

الصورة وفق ما تحققت منو “كود” تعود ل31 ماي 2023. كانت المسؤولة الحكومية الاسرائيلية زارت بلاد جدادها وطبعا دارت ليها الدولة برنامج فيه زيارة مجلس الدار البيضاء.

كاين مواضيع كثيرة ممكن تخدم عليها المعارضة لضرب الاغلبية ولكن ماشي بهاد الطريقة. ثم هاد المسؤول خاصو يحشم على عراضو. راه حزبو اللي وقع التطبيع مع اسرائيل.