محمد سقراط – كود///
في الألفينات فاش كان المغرب كيحاول ينظم كاس العالم واخا باقي بعيد من ناحية البنية التحتية، كانوا المغاربة يتوقون ويتمنون فوز المغرب بتنظيم كاس العالم، وكانوا كيحسوا بلي غادي يكون فال خير عليهم، وغادي يعاون البلاد أنها تزيد القدام وتطور وتولي حسن، وديما كان كيتجبد مثال إسبانيا بعد تنظيم كاس العالم في بداية التمانينات وكيفاش عرفات تطور كبير من وبعد هاد التنظيم، وتحسن الاقتصاد ديالها وولات دولة محترمة كيغامروا المغاربة بحياتهم في قوارب الموت باش يوصلوا ليها، وراهم باقي كيغامروا ليومنا هذا، وكانت كيتجبد حتى مثال كوريا لي نظمات الأولمبيات داك الساعة وكيفاش حتى هي تحسنات الحياة فيها وتطورات، حتى ولات دابا من أقوى الإقتصادات في العالم والمنتوجات الصناعية ديالها كاينة في أي دار في العالم.
ولكن فاش المغرب ربح شرف تنظيم كأس العالم وجا على غفلة حتى كنا نسيناه وفقدنا الأمل، خصوصا من ورا ألفين وعشرة لي نظماتوا جنوب افريقيا هاداك كنا كنعتاقدوا وكان شعور عام أنه سرق تنظيمه منا، ومن بعدها بحال الى الفكرة مابقاش محمس ليها بنادم حتى جا هاد الإنجاز على الغفلة، ولقينا راسنا ضمن الدول لي غادا تنظم كاس العالم، ودخل المغرب في دينامية الإنجاز والتنمية والتحضير لهاد التظاهرة العالمية لي تقدر تفيد البلاد والعباد، وغادا تفيدهم أكيد شوفوا مثلا غير فاس راه قرن مكانتك تزاد فيها حتى طروطوارة، حتى تحولات بين عشية وضحاها لشانطي كبير ديال الإصلاح والمشاريع وإصلاح البنية التحتية، وداكشي كيتم بسرعة خارقة والخدمة ليل ونهار، شحال هادي راه ميتين ميترو فشي شارع كيبقاو فيها عام.
دابا الواحد كيخرج من دارهم مع الصباح كيلقى ميكة ديال الزبل حطهاليه جارو في الباب، كيدير عليها فيديو ويبداه بواش هادي هي البلاد لي غادي تنظم كاس العالم، واحد راجع من السوق لخيمتهم جدو حيت تضارب مع ولاد عمو بناها فوق شي جبل معزول مكيوصو حد، صبات هاد الشتا اللخرة تغيسات الدنيا كتلقاه مصور فيديو وحاطو في تيك توك وباديه حتى هو بواش هادي هي البلاد لي غادا تنظم كاس العالم شوفو الدولة مابناتش ليا طريق بوحدي من السوق حتى للخيمة، أي حاجة كيلقاهى المغربي التيك توكي حاليا ومعجباتوش كيصورها ويبدى بواش هادي هي الدولة لي غادا تنظم المونديال، لدرجة ولتيتي تحس بلي بنادم محاملش بلادو تنظم هاد المونديال واقيلة، أو بحال الى شاد شي فيديو ديال قلة لحيا على الدولة دابا وساعة كيفكرها بيه ويبتزها، واش هادي هي الدولة لي غادا تنظم المونديال وجمعو ليا زبلي وقادو ليا داري ودعموني ورخصو ليا أي حاجة، وعطيوني الفابور نتمرغ فيه، كيفاش في ظرف عشرين عام تبدلوا المغاربة من شعب كان كيتمنى تنظيم تظاهرة كبيرة لي غادي تعاونوا باش يتقدم، لشعب كيعاير الدولة بشرف تنظيم هاد التظاهرة وأي سلوك هركاوي أو تقصير من طرف المنتخبين كتلقاه كيلوم الدولة بأكثر جملة ترديدا عند ولاد الشعب واش هادي هي الدولة لي غادي تنظم كاس العالم.
