الرئيسية > آراء > كيفاش فرانسا مافيهاش شي حركة سميتها “حركة الشباب الجمهوري” لي تخرج تقتاحم دوك المظاهرات ! هازة تصاور ماكرون و كاتغوت ” يا ماكرون رتاح رتاح سنواصل الكفاح ” آش هاد قلة النفس آ فرانسيس !
05/12/2018 11:30 آراء

كيفاش فرانسا مافيهاش شي حركة سميتها “حركة الشباب الجمهوري” لي تخرج تقتاحم دوك المظاهرات ! هازة تصاور ماكرون و كاتغوت ” يا ماكرون رتاح رتاح سنواصل الكفاح ” آش هاد قلة النفس آ فرانسيس !

كيفاش فرانسا مافيهاش شي حركة سميتها “حركة الشباب الجمهوري” لي تخرج تقتاحم دوك المظاهرات ! هازة تصاور ماكرون و كاتغوت ” يا ماكرون رتاح رتاح سنواصل الكفاح ” آش هاد قلة النفس آ فرانسيس !

سهام البارودي – كود//

هادي واحد المدة كنتي غي كاتفكر تمشي لشي مظاهرة و لا كايتجبد الحس ديال شي تجمع و لا اضراب و لا اي شكل من الاشكال الاحتجاجية و كاتسمع ديك الجملة الشهيرة ديال ” واش بغيتونا نوليو فحال سوريا ؟”  و حتى فاش بان حراك الريف و حراك جرادة و الناس خرجات كاطالب بشنو خاصها و كاتغوت على شنو ضارها بالمقابل كاتلقى جيوش ديال البلطجية هاجمين على هاد المظاهرات و كايبغيو يرونوهم و يديرو ” البلبلة”  و شعارهم الأوحد و الوحيد هوا ” واش بغيتونا نوليو فحال سوريا ؟” !

هاد الجملة ديال ” واش بغيتونا وليو فحال سوريا” مع الوقت تبدل الأثر ديالها و اليوم اي متتبع للتصرفات ديال المغاربة عبر مواقع التواصل الاجتماعي غادي يبان ليه بلي بنادم ولا كايتمسخر على هاد الجملة و لي كايقولها ! اغلب الناس عرفات بلي هاد الجملة راها اكبر قالب كايطلعوه مع راسهم و بلي بترديدها بشكل ببغائي كايبينو على جهل كبير بكيفاش كاتبنى العلاقات بين الشعوب و المسؤولين.

فرانسا اليوم كاتعيش على ايقاع احتجاجات يومية ديال اصحاب السترات الصفراء ! و البلاد مقلوبة و المسؤولين خدامين بالاجتماعات على قدم و ساق باش يحاولو يفكو الجرة و يلقاو حلول لهاد الحريرة !

ماشفتش شي حركة سميتها ” حركة الشباب الجمهوري” خارجين بالبنادر و الطعارج كايغوتو وا ماكرون زطاقاطاق ! وا ماكرون زطاقاطاق ” يا ماكرون ارتاح ارتاح ! سنواصل الكفاح ”  ! و غادين قاصدين المحتجين و هازين التصاور ديال ماكرون و كايغوتو ” واش بغيتو تردونا فحال سوريا ؟ ” ! ماشفتش شي فيديو مصورو شي واحد مسمي راسو ” مول الدلاحة ” و لا ” مول الگرعة” فبورطكليشي  كايقول فيه ” هانتوما شوفو الحمد لله البطاطا بجوج اورو و ماطيشة باورو و نص ! و الدلاح بثلاتة اورو تبارك الله عايشين بيخير و على خير ماخاصنا خير آ خويا ! هاد الناس بغاو يديرو لينا الفيييتنااا ” ! ماسمعناش بلي هاد اصحاب السترات الصفراء راهم خونة و لا انفصاليين مدعومين من طرف سبانيا و لا بلجيكا !

هادشي ان دل على شيء فإنه يدل على ان الناس فاهمة و عارفة بلي المظاهرات  ظاهرة صحية ! و كون ان الناس تخرج تغوت على حقها ! و دير مظاهرات و اضرابات و اعتصامات ! راه ظواهر صحية ماعندش الحكومة او المسؤولين لي بعقلهم علاش يخافو منها و يحاولو يطمسوها و يغبرو لباباها الشقف ! الاشكال الاحتجاجية كاتبقى تعبير صحي على شنو واقع فالمجتمع و شنو كايضر الناس ! و كاتبقا مناسبة لاصلاح ما يمكن اصلاحه ! فحال فاش كاتشدك السخانة ! كاينين جوج حوايج يا تمشي عند الطبيب و يشوف شنو عندك و يكتب ليك الدوا و تشافى ! يا تبقى بسخانتك تاتمشي و تعاود ترجع وتمشي و تعاود ترجع حتى للنهار لي السخانة تولي وجع و ارهاق و كحبة و …تلقا راسك فيك شي مصيبة كحلة لا ينفع معها علاج.

خروج الناس للاحتجاج راه مسألة ايجابية كاتعني انه الناس باغا التغيير ! باغا التغيير باش تبني شي حاجة فالبلاد ! ماباغاش غا تقضي و تعدي و لا تهاجر و لا تحرگ ! لا‌ باغا تعيش هنا و دير مستقبلها هنا ! هادشي علاش للأسف كايجيني بلي اي حراك كايتقمع فالمغرب راه كايخلينا نزگلو مناسبة مهمة للاصلاح الحقيقي و الجذري ! اي مظاهرة كاتقمع و اي حركة احتجاجية كايخرجو ضدها بوزبالات بشعار ” واش بغيتونا نوليو فحال سوريا ” و كاتقمع راه كاتكون خطورة فاتجاه نوليو فحال سوريا اكثر ماكاتبعدنا على سوريا.

 

موضوعات أخرى

16/12/2018 10:00

قضية شحنة الكوكايين ديال 200 مليار ما زال كيبان فيها لعجب. كولومبي كان غادي يدير مدرج سري فالداخلة لتهريب الغبرة من أمريكا اللاتينية للمغرب

16/12/2018 08:00

والي جهة العيون باغي يشعل القَبَلِية فالصحرا. ها كيفاش بغا يتحكم فمهرجان الفيلم الوثائقي لي غادي يدار فالعيون وكيفاش فرض ولاد عمو صحة على المركز السينمائي