گود-وكالات//

الجمعية العامة ديال الأمم المتحدة صوتات على قرار كايدعو لاستعمال خريطة عالمية كاتبيّن القياس الحقيقي ديال القارات بشكل دقيق، عوض خريطة ميركاتور اللي تسعملات من قرون.

خريطة ميركاتور تصمّمات ف 1569، وكانت الهدف ديالها تعاون البحارة فالملاحة، ولكن عندها مشكل كبير، كأكبر البلايص الكبيرة وكأصغر المناطق القريبة من خط الاستواء. وهاد الشي كيخلي إفريقيا تبان صغر بزاف مقارنة مع القياس الحقيقي ديالها.

فالتصويت، 164 دولة صوتات مع القرار، أما مريكان صوتات ضدو، وستة دول امتنعات. ومع ذلك، القرار ماشي ملزم قانونياً، يعني الدول ماشي مجبورة تبدل الخرائط ديالها.

من بين الخرائط اللي كايتقترح استعمالها كاينة خريطة Equal Earth، اللي تصمّمات ف 2018 وهدفها تمثيل المساحات الحقيقية ديال القارات مزيان، المؤيدين ديالها كايقولو إن هاد التغيير يقدر يعاون الناس يفهمو القياس الحقيقي ديال إفريقيا، خصوصاً فالمدارس والمناهج التعليمية.

توغو لعبات دور كبير فهاد الحملة باسم الاتحاد الإفريقي، واعتبرت أن الطريقة اللي كايتصوّر بها العالم فالخرائط عندها تأثير ثقافي وتعليمي وحتى جيوسياسي. وقالت بلي الوقت جا باش تتصحح هاد الصورة القديمة.

فرنسا حتى هي علنات أنها غادي تحيد تدريجياً خريطة ميركاتور وتستعمل خرائط صحيحة فالمساحات.

والهدف النهائي ماشي غير تبديل خريطة بخريطة، ولكن تصحيح واحد التصور قديم على حجم القارات. وبالنسبة للمؤيدين، إفريقيا خاصها تبان فالعالم بالحجم الحقيقي ديالها، ماشي بالحجم المشوّه اللي كاتعطيه خريطة ميركاتور.