كود كازا ///

كاين فيديو ماشي جديد بزاف فيها صحافي من “شوف تيفي” كيدير خدمتو. بان ليه عبد الحق حمداوي عامل عمالة الفداء درب السلطان فكازا كيدور٬ مشى يصور. العامل غادي مع فريق ديالو ومسؤولين امنيين واخرين٬ وقف ودار عند الصحافي والكاميرا شاعلة. باش تعرفو ذكاؤو. سولو. الصحافي جاوبو باللي صحافي.
العامل رد عليه “الصحافة ديالاش”. كيفاش “صحافة ديالاش”. وزاد كملها باش سولو على بطاقة الصحافة وقال ليه “شكون عطاها ليك”.

الصحافي كان مؤدب كان يقول ليه شي جواب اخر. كيفاش شكون عطاها ليك.

كيفاش يتحطو عمال بحال هادو. كيبان اولا عندو ديك عقلية صحاب ادريس البصري. متسلط ماشي ولد الوقت وولد المفهوم الجديد للسلطة. عامل كيعني الادب. تكلم بادب.

حتى شاف البطاقة الصحافية عاد لين من حدة كلامو.

هاد التصرفات ما خاصناش نبقاو نشوفوها. لا من والي ولا عامل ولا غيرو. ثم العامل عندو ناسو يسولو ويعرفو ماشي يشي يسول بتسلط. هادا راه كان قايد فنفس العمالة قبل ما يولي عامل فصفرو. عندو ديبلوم الدراسات المعمقة فالقانون. باين خاصو يتعمق فالتعامل مع المواطنين ومع الصحافيين