كود سبور كازا ////

الاجتماع اللي دارو رئيس الوداد البيضاوي هشام ايت منة مع اعضاء المكتب المديري للنادي ول البارح لثلاث ما كان فيه والو. باستثناء اهانة عمدة المحمدية =ايت منة= للاعضاء باش خلاهم يتسناو شي ساعة ونص واحتجاج عضو واحد. كلشي ضرب الطم.

شفتي باش تكون عضو فمكتب وتمشي لميريكان ويستافدو شي اعضاء من 1500 دولار بالاضافة للطيارة ولوطيل كيفاش تقدر تتخلى “الحمرا”.

اجتماع ما كانش فمستوى الشوهة اللي كان سبابها اختيارات رئيس مغرور وعد باش يجي الثاني فالبطولة وما جاش. ريب داك الشي اللي دارو سيدو الرئيس السابق سعيد الناصري.

حسب اعضاء المكتب المديري ل”كود” فايت منة خرج رابح. النقاش كان على شكون كيخرج لخبارات للصحافة ومنها “كود” ماشي لتقييم موضوعي للمشاركة “قولبنا وقول كلشي” يوضح عضو اخر ل”كود”. غير هو ما عندوش الجرأة يقولها فالاجتماع.

دابا باقي غير شهر باش يتسد الميركاتو والرئيس وحل غير مع اللي باغي يمشي فحالو. حسب ما علمته “كود”، كاينين لعابة باغيين يمشيو فحالهم. لحد الان خلى غير لكرارص للحمرا. بحال هاداك لبرازيلي ولا داك المغربي الهولندي.

فموضوع عندو علاقة برئاسة الوداد، علمت “كود” باللي ايت منة دابا معول على الديساوي باش يعاونو. دابا هاد ايت منة كان كيحاربو. خرج عليه شلى امور وغادي نرجعو ليها ف”كود”، واليوم شاد فيه. المشكلة هو كيفاش سياسي اتحادي قافز بحال الديساوي طاح فالفخ مع واحد حاربو بالتخبية هو وحارب ولدو