سعيد الشاوي الرباط كود ///

اليوم لاربعا 2 اكتوبر 2024 كاينة “المناظرة الثقافية للصناعات الثقافية والابداعية” تحت رعاية سيدنا وبتنظيم وزارة الثقافة والشباب والتواصل وفيدرالية الصناعات الثقافية والابداعية لدى الاتحاد العام لمقاولات المغرب. المناظرة ديال اليوم تحت عنوان “الاحتفاء بالتراث والاستثمار في المستقبل. هاد الشي فيه حضور مسؤولين كبار فالقطاعين العام والخاص وكاين حضور غريب للفرنسيين. 

قبل ما نهدرو على هاد الموضوع٬ ما مفهومش علاش كاين حضور فرنسي واوربي. فيها هيمنة فاسة. حاضرين بقوة بحال ايلى تجمع عائلي ماشي مناظرة للمغاربة. اليوم ايلى هدرو بالفرنسية عرفو هاد الشي غير مسرحية. عرفو باللي ماشي معنيين بيها لمغاربة والمستقبل٬ بل هاد لفاسة باش يزيدو يجمعو لفلوس فهاد القطاع اللي بدا كيتحرك

نرجعو لاسم المناظرة. راه عبث فعبث ان بلاد ما فيهاش سياسة ثقافية حقاش وزير الشباب والثقافة ناقصاه الرؤية السياسية والعمق باش يقدر يرسم سياسة ثقافية٬ ومعاه مستشارين دراري صغار ما شاربينش عقلهم فالحياة فما بالك فرسم سياسة ثقافية للبلاد٬ دابا فغياب هاد التصور لما يجب ان تكون عليه الثقافة بالبلاد٬ جايين كيهدرو على “الصناعات الثقافية”. 

فاي دومين٬ الصناعة كتكون باش تكون سياسة اولا. ما يمكنش نسبقو الصناعة الثقافية وانت ما عندكش سياسة ثقافية. ما عندكش وضوح لما يجب ان يكون عليه المسرح من بدايتو حتى الجانب الاحترافي٬ ما يمكنش ما يكونش عندك ورشات فالفنون والسينما والكتابة والرسم فالمدرسة العمومية. ما عندكش خدمة على الطفل المغربي بتمويل الجماعات المحلية٬ ما عندكش تأهيل لمؤطرين فدور الشباب مؤهلين.
ما يمكنش تهدر على صناعة ثقافية وانت ما عارفش اش باغي من الثقافة. الوزير كيدير سياسة الفرجة ماشي سياسة ثقافية. ما كيبنيش الساس.

كيفاش تكون مناظرة للصناعات الثقافية فالرباط وانت كدولة فاشل حتى فتدبير جوج مسارح خسرو عليهم لملاير. واحد فكازا والثاني فالرباط. هادي كتعطي صورة على لبلاد. بنينا لحيوط قبل ما نفكرو اش غادي نديرو بيهم. النتيجة٬ هادي سنوات وهما مسدودين. فكازا كيخسرو تقريبا ملايين الدراهم وهو مسدود. ديال لونتروتيان.

كان تكون هاد المناظرة مزيانة كون داروها غير على كيفاش نخرجو من هاد الورطة ديال مسرحي كازا والرباط

اليوم غاديين يجيو لملايرية كيهدرو علي الثقافة. كثير فيهم يهدر بلغة ماشي ديال لمغاربة. راكم عارفيين النتيجة.