كود احمد الطيب الرباط ///

البارح 23 اكتوبر 2024 عين سيدنا رسميا الحكومة 2 للي وجدها رئيسها عزيز اخنوش. فهاد الحكومة اللي كتشكل من 30 وزير ووزير منتدب وكاتب دولة =نساء ورجال=. فهاد الحكومة دخلو 14 وجه جديد. فيهم 6 وزراء وهما:
محمد سعد برادة: وزير التربية الوطنية والتعليم الأولي والرياضة
أمين التهراوي: وزير الصحة والحماية الاجتماعية
أحمد البواري: وزير الفلاحة والصيد البحري والتنمية القروية والمياه والغابات
عز الدين ميداوي: وزير التعليم العالي والبحث العلمي والابتكار
عبد الصمد قيوح: وزير النقل واللوجيستيك
نعيمة بنيحيى: وزيرة التضامن والإدماج الاجتماعي والأسرة

وجوج وزراء منتدبين وهما: كريم زيدان: الوزير المنتدب لدى رئيس الحكومة المكلف بالاستثمار والتقائية وتقييم السياسات العمومية وأمل الفلاح السغروشني: الوزيرة المنتدبة لدى رئيس الحكومة المكلفة بالانتقال الرقمي وإصلاح الإدارة.

و6 كتاب دولة وهم:
زكية الدريوش: كاتبة الدولة لدى وزير الفلاحة والصيد البحري والتنمية القروية والمياه والغابات المكلفة بالصيد البحري
عمر احجيرة: كاتب الدولة لدى وزير الصناعة والتجارة المكلف بالتجارة الخارجية
أديب بن إبراهيم: كاتب الدولة لدى وزيرة إعداد التراب الوطني والتعمير والإسكان وسياسة المدينة المكلف بالإسكان
هشام صابري: كاتب الدولة لدى وزير الإدماج الاقتصادي والمقاولة الصغرى والتشغيل والكفاءات المكلف بالشغل
لحسن السعدي: كاتب الدولة لدى وزيرة السياحة والصناعة التقليدية والاقتصاد الاجتماعي والتضامني المكلف بالصناعة التقليدية والاقتصاد الاجتماعي والتضامني
عبد الجبار الراشدي: كاتب الدولة لدى وزيرة التضامن والإدماج الاجتماعي والأسرة المكلف بالإدماج الاجتماعي

لكن اشنا هو الهدف من هاد التعديل؟ حسب قيادي من حزب الاحرار اللي كيقود هاد الحكومة٬ فالهدف من التعديل هو “ضخ دينامية جديدة في العمل الحكومي”. مصدر “كود” كيأكد على ان هاد النسخة 2 هي “إستمرارية” للنسخة 1 و”تعزيز مردودية المنجزات الحكومية”.

فهاد السياق فسر مصدر اخر ل”كود” هاد الشي بتعزيز الفريق الحكومي الجديد ببروفيلات “قادرة على تدبير ملفات مهمة في قطاعات استراتيجية على غرار الفلاحة و الصحة و التعليم و التشغيل”

حكومة اخنوش 2 معول على امين تهراوي وزير للصحة الجديد باش يوجد تصور قادر على وضع الوكالات الاستراتيجية الثلاث اللي كيتهم القطاع وهي: الوكالة المغربية للادوية والمنتجات الصحية وخداها سمير احيد ورئيس الهيئة العليا للصحة وخداها مصطفى ابو معروف والوكالة المغربية للدم ومشتقاته وخداها كمال الدغمي. عندو حتى تنسيق مع الوكالة الوطنية للدعم الاجتماعي اللي خداتها وفاء جمالي حقاش وزير الصحة عندو حتى الحماية الاجتماعية. غادي يكون عند هاد الوكالة تنسيق حتى مع الوزير المنتدب المكلف بالميزانية

اي ان دور تهراوي غادي يكون ينسق بين هاد الوكالات ويساعدها باش تحقق داك الشي اللي تأسسات من اجلو. هادا ما يفسره مصدر “كود” “تهراوي كيتسناه دور مختلف على اللي سبقوه فهاد المنصب. دورو “حسن الحكامة فالتنسيق بين الوكالات الثلاث” و”حسن الحكامة في التنزيل الترابي ديال استراتيجية الصحة”

بخصوص استوزار سعد برادة ومنحو وزارة كبيرة بحال التعليم والتربية الوطنية٬ اكد مصدر “كود” بللي غادي يستمر فالاستراتيجية اللي كان وجدها شكيب بنموسى٬ اي “كاينة استمرارية فتنزيل الاصلاح لي عطاتو الحكومة جميع الموارد المالية و البشرية لي محتاج ليها و الي كلف الحكومة و رئيسها ثمن سياسي كبير”

فقطاع الفلاحة اختار اخنوش اللي كيعرف القطاع مزيان٬ خبير فالقطاع وخاصة الماء والري. دابا الماء اكبر تحدي فالبلاد. عليها جاب احمد بواري. طبعا عندو هموم اخرى وهي تعبئة مهنيي القطاع لمحاربة الغلاء”

جديد هاد الحكومة كان مشاركة مغربي من مغاربة العالم فيها. يتعلق الامر بكريم زيدان: الوزير المنتدب لدى رئيس الحكومة المكلف بالاستثمار والتقائية وتقييم السياسات العمومية. خدا بلاصة محسن الجزولي. هاد المهندس ولد الشعب وتقاتل باش يوصل وولى مهندس كبير فشركة السيارات الالمانية الشهيرة “بي ام”. حسب مصدر “كود” هادي التفاتة كبيرة لهاد لمغاربة.

مصدر “كود” عاود وشدد باللي الفريق الجديد مع الفريق لقديم كلهم “كفاءات” وهي حكومة “استمرارية” ولكن هاد المرة غادي يكون الايقاع اسرع لتنزيل مختلف الاستراتيجيات الحكومية اللي كانت وجدات فحكومة اخنوش 1. من اهم هاد الشي : “أوراش الدولة الاجتماعية أو اللي غادي تجيب الشغل”

هندسة حكومية٬ يضيف مصدر “كود”٬ تعززات ب6 كتاب دولة فقطاعات حيوية بحال التشغيل” وهاد الشي كيعكس “ورش الحكومة لكبير وهو التشغيل” وجعلو “أولوية استراتيجية بالنسبة للحكومة في ما تبقى من ولايتها الانتدابية”

وشدد مصدر “كود” على ان البروفيلات اللي دخلات للحكومة فيها بالاضافة الى الكفاءة والخبرة والقدرة على تنزيل استراتيجيات كبيرة٬ بروفيلات سياسية “من خلال انضمام مجموعة من الوجوه المعروفة على الساحة السياسة ووجوه سياسية شابة بحال لحسن السعدي”.