كود سبور القاهرة ///

الاحد 19 ماي اللي فات لعبات نهضة بركان ضد الزمالك فسطاد القاهرة بمصر نهاية كأس الكونفدرالية. بركان خسرات الكاس بعد ما خسرات بواحد لزيرو. ماتش الذهاب كان ربح النادي المغربي ب2 لواحد. هاد الماتش مهم بسباب موضوع اخر. هاد المرة ربحات فيه الجمعية الوطنية للاعلام والناشرين رهان نقل الصحافيين والصحافيات لمصر ذهاب واياب واقامة وتنقل. تنظيم كان مقاد. خلات الصحافيات والصحافيين يركزو على خدمتهم عوض ما يضيعو وقتهم كولو فالبحث عن اوطيل وبيي طيارة والطاكسيات فمصر

علاش قلنا ربحات الجمعية اللي ترأسها ادريس شحتان وكان مرفوق بالكاتب العام المختار لغزيوي وامين المال خالد الحري. ربحات لانو التنظيم ترقى بزاف. تجربة كأس افريقيا اللي دازت بسان بيدرو بالكوت ديفوار كانت الانطلاقة. الجمعية الوطنية للاعلام والناشرين دخلات تجربة صعيبة فتنظيم قطاع الصحافة الرياضية. كان عدد كبير من الصحافيين. كانو حسابات كثيرة. كانت جهات باغية هاد الشي يفشل. دارت محاولات. هاد الشي مجموع خلى اخطاء توقع فاول ليلة للصحافيين فسان بيدرو. تم تدارك داك لشي فالايام اللي من بعد. 

لكن تجربة مصر كانت مختلفة. كلشي فيها مختلف. اوطيل مزيان وظروف زوينة باش الصحافي يركز فقط على خدمتو.  اللي كيدير تغطيات فافريقيا بالخصوص كيعرف اش كيعني تجي جمعية مهنية تهنيك من النقل والاقامة. راه معاناة حقيقية تحيدات من كتف الصحافيين والصحافيات اللي كيخدمو فقطاع الرياضة.

تجربة مصر كانت خطوة للقدام. واخا دخلات الصحافة الجهوية. ما فيها باش اعلاميون من بركان يمشيو مع نادي متبعينو 364 يوم فالعام. 
هاد التجربة المصرية خاصها تكون بداية لعمل الجمعية الوطنية للاعلام والناشرين فتنظيم الصحافة الرياضية.

طبعا الجمعية ما كتحتاكرش هاد الشي. اي جمعية مهنية بغات دير بحالها وتخدم باش توفر للصحافيين والصحافيات الامكانيات للخدمة مرحب بها. غير هو رئيس الجمعية ادريس شحتان هز النيفو فمصر. وهنا فليتنافس المنافسون