سعيد الشاوي – كود كازا ///
بيان هيئة المحامين بالدار البيضاء غريب. دابا بيان هيئة المحامين بالمغرب كان الى حد ما مهني واضح. طلب التحقيق واشاد بفتحو فقضية تسريب التسجيل الصوتي بين القضاة. لكن هيئة محامين الدار البيضاء ركزات بشكل ما مفهومش على القاضية مستشارة بمحكمة النقض والعضوة السابقة بالمجلس الاعلى للسلطة القضائية. ركزو على ما سموه “تدخل القاضية” واعتبروه “سافر” و”انتهاك لمبدأ استقلال القضاء” وتأثير عليه.
دابا تم فتح تحقيق بامر من الرئيس المنتدب للسلطة القضائية ورئيس النيابة العامة.
نورمالمون باش تفتح تحقيق كان خاص المحامين يتسناو اش غادي يخرج منو.
فهاد البيان ديال محامين الدار البيضاء بحال بيان محامين المغرب ما فيهش اشارة لا من قريب ولا من بعيد لنقطة اخطر. شكون سجل المكالمة وشكون سربها. وا عباد الله ففرانسا ناضت ضجة كبيرة باش المحامي هيردزوك اللي كان محامي ساركوزي تسجل واخا كان هاد الشي بامر القضاء. اللي تزعم هاد الاحتجاج على تسجيل محامي هو المحامي الشهير ايريك ديبون موريتي اللي هو وزير العدل الحالي ففرانسا.
دابا المحامون واللي مكلفين بالدفاع عن استقلالية القضاء ما كيهمهمش شكون سجل وكيفاش دار هاد التسجيل ولمن تسرب فاللول. هاد الشي اللي وفع فهاد التسجيل راه اخطر حقاش كيهم قضاة.
اش من عدالة بقات باش قاضي من هاد القضاة سجل المكالمة وسربها. اللي مستافد من هاد الفيلم غادي يسرب التسجيل.
ثم نجيو لنقطة اخرى. واش القاضية عايشة الناصري المعروفة بنضالها وتاريخها الحقوقي يكمن شي حد فالقضاء يتاهمها فالفساد؟ ابدا. يكفيها ان واحدة من اشهر الجمعيات الفرنسية ذات المنفعة العامة عطاتها وسام.
قاضية نزيهة وحرة وعلاش كتخلع شي فاسدين هو لسانها. كانت محاولات كثيرة تسكتها وتشوهها وفشلات.
ساهلة باش تعرفو شكون الفاسد فهاد الميدان. سيرو شوفو حسابات كل واحد البنكية وشوفو فين عايش وشحال كيصرف وواش عندو شي ورث ولا بدا مسيرتو من الزيرو وكلشي بيان ليكم.
غاديين تكتاشفو باللي الناصري نقطة ضوء فهاد الميدان وكاين شي جهات ودابا يبان هاد الشي باغية تطفي هاد الضو.
خاص الرئيس المنتدب للسلطة القضائية يدير الفرشة لكلشي. يخرج نتائج التحقيق كاملة ديال هاد الدوسيي. ديك الساعة يمكن لجمعيات المحامين دير بيان ووقفات بناء على نتائجو.
