كود -وكالات//
تاريخ اختراع “السّكاتة” أو اللهاية كيرجع لبداية القرن العشرين، وبالضبط لعام 1901 ملي سّجل الفرماصي الأمريكي كريستيان ماينكي براءة الاختراع ديالها.
هاد الأداة الصغيرة اللي كتهدن الدراري الصغار دازت من مراحل غريبة بزاف قبل ما تولي بهاد الشكل اللي كنعرفوه اليوم.
ملي كيبدا شي تربية صغيرة فالبكا والغوات، أول حاجة كتمشي ليها يد الأم هي “السّكاتة” (أو “التيتينا”). هاد الاختراع البسيط كيبان لينا عادي وموجود في أي دار، ولكن قليل اللي عارف بلي وراه تاريخ طويل وقصص غريبة بزاف.
من بكري والوالدين كيقلبو على أي طريقة يسكتو بيها ولادهم. زمان، الرومان والإغريق كانوا كيعطيوا للدراري الصغار حجار ملسا، عادات ديال العاج، أو عظام الحيوانات باش يعضو عليها ويبردو ليهم لثّتهم.
أما الفكرة القريبة للسّكاتة ديال اليوم، فكانت هي “كموسة السكر” ، الأمهات كانوا كيشدو طريف د التوب نقي، يديروا وسط منه شوية د السكر أو العسل ويجمعوها بحال شي كموسة صغيرة ويعطيوها للتربية يمصها. وخا هاد الطريقة كانت كتسكت الصغار، ولكن كانت كتدير ليهم السوسة وكتجيب ليهم الميكروب.
فـ عام 1901، فاش غايتغير كلشي. واحد الفرماصي ف مانهاتن (نيويورك) سميتو كريستيان ماينكي، فكر يدير شي حاجة نقية وآمنة،اخترع أداة سماها “مُهدئ الطفل” (Baby Comforter)، وكانت كتكون من حلمة ديال المطاط المرن (Rubber)، ودار ليها دورة أو قُرص ديال البلاستيك أو العاج باش يمنع التربية من أنه يسرطها.
هاد القرص كان هو الثورة الحقيقية، حيت حمى بزاف د الرضع من الخنق. من بعد، ف عام 1903، جا مخترع آخر سميتو هارفي سبنسر وزاد طور فيها وعدل ف الشكل ديالها.
فالأول، هاد السّكاتات ديال المطاط كانت كتصنع بطرق قديمة وكتكون فيها ريحة خايبة ومواد ماشي صحية بزاف (بحال الكبريت والرصاص). ومع الوقت وتطور العلم والصناعة، الشركات بدات كتخدم السيليكون واللاتيكس الطبي، وهما المواد اللي كنشوفوهم دابا: رطبين، ما فيهومش ريحة، وساهلين فالتعقيم.
اليوم، السّكاتة مبقاتش غير طريف د الميكا؛ كاينين سكاتات “أورتودونتيك” (Orthodontic) مصاوبين بطريقة كتحمي السنان والفك ديال الدري، وكاينين حتى سكاتات ذكية كتسد بوحدها غير كطيح فالأرض باش تبقى نقية.