كود سبور//

خالق الدولي المغربي السابق المهدي كارسيلا جدل كبير فبليجكا، اللي تزاد وكبر فيها ووفرت له الظروف باش يلعب الكورة، وبمقابل ما يدعو المغاربة والأجانب المقيمين فيها إلى احترام البلاد والقيم ديالها، ناض يحرض ضد الاحتفال بأعياد الميلاد.

وحسب جورنال sudinfo البلجيكي، بارطاجا الدولي المغربي السابق والناجم السابق لستاندرد دو لييج البليجيكي، 2 فيديوات ديال شي واحد من الدعاة الإسلاميين المشارقة الراديكاليين كايحرض فيه ضد حفلات عيد الميلاد، وضد الشراب وضد الغنا والموسيقى، وكايحرش المسلمين باش ما يباركوش للناس اللي محتافلين بنويل.

بحال هاد التصرفات ديال كارسيلا خلات الإعلام البلجيكي مبرزط بزاف، خصوصا وأن هذا الفيديوات اللي نشر، فيهم نوع من الدعوى إلى التطرف ضد ناس باغيين يحتافلو بنويل فبلاد هي أصلا علمانية وكاتحمي حقوق كلشي سوى الأغلبية المسيحية او الأقليات المسلمة واليهودية، وناضت الجريدة عيطت له باش يوضح علاش نشر هذا الشي، ولكن هو ما كايجاوبش فالتيليفون.

المهدي كارسيلا خاصو يعرف أنه شخصية عندها متابعين وبحال هذه التصرفات تقدر تسيء ماشي غير له شخصيا ولكن حتى كلاعب سابق حمل التوني د المغرب وكايجي للمغرب يتكون، حيث الجريدة المذكورة ركزت على أنه كايعيش بين بلجيكا والمغرب، وحطات تصويرة ديالو وهو مطول اللحية ولابس توني فيه اللوگو ديال الجامعة الملكية المغربية لكرة القدم، وقالت أنه كان في دورة تدريبية مؤخرا بالمغرب لتكوين المدربين، ونشرت حتى تصريحات قالت إنها ديال ماماه تتبرى من هذا التشدد الديني اللي فيه هو دابا. وقالت إنها ما رباتوش هاكدا ولكن هو اللي اختار يولي هاكدا.

طبعا كارسيلا كايبقى مسؤول على راسو فبحال هاد الفيديوات اللي كاينشر، حيث المغرب بلد ديال الانفتاح والتسامح والتعايش، وعدد من المناطق والمدن المغربية فيها الاحتفال برأس السنة بحالها بحال المدن البلجيكية، والمدن المغربية فيها الأمن والأمان على بلجيكا وما كاينش اللي يقول لشي حد شحال الساعة، خاص غير كل واحد يحترم الآخر وما يديرش الفوضى واللي تعدى على شي حد كايتعاقب بقوة القانون.