كود سبور//

مستغرب أي رجاوي وأي محب للرجاء الرياضي، من الطريقة اللي كايسير بها الرئيس عادل هالا وأعضاء المكتب المديري النادي، وعلاش قابلين يحطو ريوسهم في وضع صعيب ما يبغي حتى شي حد يكون فيه بالبقاء فالنادي والأغلبية الساحقة من الرجاويين جمهور ومنخرطين تطالبهم بالرحيل.

والسؤال اللي كايطرحو كل رجاوي محب للخضرا، وكل متتبع للشأن الرياضي الوطني، هو شنو السبب اللي مخلي رئيس الرجاء الرياضي عادل هالا والمسيرين اللي معه متشبثين بالبقاء في رئاسة النادي، وهذا الشي بالرغم من الوضع الكارثي اللي وصل له الفريق خلال المرحلة التسييرية ديالهم، وشنو اللي مخليهم صابرين على السبان والمعيار اللي كايتوجه لهم فالتيران وعلى مواقع التواصل الاجتماعي، لدرجة ان الولدين ديالهم تسبو ولكن عادل هالا واللي معه من اعضاء المكتب المديري مازالين شادين الرئاسة.

عادل هالا اللي كان كايقول انه زاهد في كرسي الرئاسة، وقال المقولة الشهرية ديالو للمنخرطين خلال الجمع العام الماضي اللي طلع فيه رئيس: “اقسم بالله العظيم أنا زاهد في هذا الكرسي، والله ما باغيه اقسم بالله ما باغيه، وتقولو ليا دابا سير بحالك نمشي بحالي”، تحول ومن بعد تقريبا 4 اشهر فقط دوزها على رأس الرجاء الرياضي، (تحول) من زاهد في كرسي الرئاسة إلى متشبث به وما باغيش يطلقو، ومتحمل غضب الشارع الرجاوي والصفحات الرجاوية على مواقع التوصل الاجتماعي وحتى المنخرطين، وما مسوقش للأصوات ديال المطالبين بالرحيل ديالو، والسبان والمعيار.

وقدر عادل هالا والمكتب ديالو يقاومو حتى لدابا الجمهور والمنخرطين والالتراس، اللي رفعوا ميساجات قوية يوم ماتش الرجاء ضد اتحاد التواركة، وطالبوه بالرحيل عن النادي هو والمكتب المديري، لدرجة ان الجمهور خرج بحالو وسط الماتش احتجاجا على الوضع الكارثي اللي وصل له الفريق مع هالا والمسيرين اللي معه، وشبعو فيهم سبان، وقالو لهم يمشيو بحالهم، والأكثر من هذا وخلال اللقاء التواصلي اللي عقد رئيس الفريق مع المنخرطين حضرو ممثلين عن الألتراس وعاتبوهم مزيان وطلبو منهم يمشيو بحالهم حيث فشلو فالتسيير ووصلو الفريق لحالة كارثية.

وخرج عادل هالا من ورا اللقاء مباشرة وقال لوسائل الإعلام انه سيتم الإعلان عن المرحلة الانتقالية او ما يخص الاستقالة من ورا ماتش ماميلودي صن داونز الجنوب افريقي في دوري ابطال افريقيا، وهذا الشي دازت عليه دابا كثر من 10 ايام، ومازال ما اعلن هالا على حتى حاجة لا البقاء ولا الرحيل، وبالمقابل أنس الزنيتي الكابيتان ديال الفريق هو اللي قرر الرحيل، وقائمة المرشحين لمغادرة الخضرا من اللاعبين قابلة للارتفاع بسبب الحالة الكارثية اللي بطل المغرب وكاس العرش، واللي تحول من بطل لا يقهر مع الرئيس السابق محمد بودريقة بلا خسارة خلال الموسم الماضي كامل في انجاز غير مسبوق مغربيا إلى فريق مقهور هذا الموسم مع عادل هالا.

أما باقي الاعضاء ديال المكتب المديري للرجا راه ضاربين السكات بإستثناء خالد فكيري الكاتب العام، وهشام الوزاني رئيس اللجنة الطبية اللي وفاو بالكلمة ديالهم وقدمو استقالتهم من ورا ماتش صن داونز، أما باقي الاعضاء فحتى حد ما خرج يعبر على الموقف ديالو بشكل صريح ويواجه الجمهور ويقول له بصراحة واش هو مع بقاء عادل هالا او يقدم الاستقالة وينضم للأصوات المطالبة برحيل الرئيس، ماشي تبقى الشكوك تحوم حول كل عضو من المكتب المديري واش حاط رِجل مع هالا ورِجل مع المطالبين برحيل هالا.

والسؤال اللي ديما كايسولو اي رجاوي ملي تأزمت وضعية الرجا مع المكتب المديري الحالي برئاسة عادل هالا واللي معه، واش لهذه الدرجة المسير فالرجا قابل على راسو يتعاير ويتسبو له والديه مقابل انه يبقى على راس فريق كرة قدم، ولا كاين شي مقابل آخر ما عارفو حد من غير اللي متشبث بالكرسي؟