كود كازا//

قالت صحيفة “واشنطن بوسط” ان حماس بدات تطلق القرطاس مع الفجر نهار السبت على آلاف المحتفلين كانو كيشطحو فمهرجان super nova للإحتفال “بالأصدقاء والحب والحرية اللانهائية”.

واضافت الصحيفة الأمريكية أن مهرجان “قبيلة نوفا ترانس” الموسيقي، جا فبلاصة خاوية ومعزولة فيها غير الشجر و الطبيعة، ومنظمي المهرجان كانو شارطين على الحضور مايجيبو معاهم لاادوات حادة ولا اسلحة للمهرجان واللي سهل على حماس تسيطر على المنطقة.

وهادشي اللي كتأكد وكتعاود ميلة بن حاييم، 27 عام، وحدة من الناس اللي قدرات تهرب من الهجوم ، كتصرح بن حاييم للصحيفة انها كانت فالمهرجان مع صحابها حتى سمعو صفارات الإنذار والصواريخ ووقفات الموسيقى.

واضافت بن حاييم انه فالاول ملاحظوش الناس صوت الانفجارات بسبب الموسيقى اللي كانت مجهدة ولكن من بعد، ” كلنا بدينا نجريو ماعرفنا لافين نمشيو ولا شنو نديرو”.

كتقول بن حاييم،” شفت مسلحين جايين لعندنا خديت سوارت طموبيل صاحبتي وعمرتها باللي قديت ديال الناس وهربنا، واللي بقاو ياتقتلو ياتخطفو غالبا”.

” حتى الطموبيلات تهجمو عليهم حيث كانو الرجال بالسلاح فكل بلاصة وكانو جثث فوق طومبيلات وهادشي صعب علينا نهربو … كملات بن حاييم ، ” كملنا الطريق بطموبيل صديق اخر وزدنا غير شي امتار ونقزنا من الطموبيل وهربنا للخلا نكملو على رجلينا، و بقينا كنجريو شي ساعتين والقرطاس كيضرب، و موراها بقينا غير كنزحفو حتى مقدرناش وتخبينا وتغطينا بوراق الشجر…

ومن بعد 7 دلال السوايع، كتقول بن حاييم جاشي واحد من السكان وقدر يعتقها ولكن واحد من اللي معاها شدوه.

وفجهة اخرى لنوا أرغاماني هي وصديقها أفيناتان أور اللي كانو هاربين موقفش معاهم الزهر وتشدو واللي تنشرات من بعد فيديوات ديالهم على مواقع التواصل الاجتماعي فاش خطفوها على موطور وصديقها ربطوه وجروه.

شاني لوك 22 سنة، حتى هي بانت ففيديوات تنشرو على مواقع التواصل الاجتماعي، بانت فيهم فكاميو غادي لغزة وهي حادرة راسها مع 4 دالناس مسلحين ، وحدة ناتفاها ووحدة هازة الفردي وكتغوت ، “الله أكبر!” ومعاها ناس تابعين الكاميو كيغوتو الله اكبر حتى هوما، ودري صغير كيدفل عليها .

https://www.washingtonpost.com/world/2023/10/08/israel-festival-attack-gaza-militants/