كود احمد الطيب الرباط ///

نهار لثلاث 29 اكتوبر 2025 فالعشية وبامر من سيدنا تم تدشين المسرح الملكي بالرباط من قبل الاميرة لالة حسنا وبيريجيت ماكرون مرات رئيس فرانسا.

الاميرة ازاحت الستار عن اللوحة التذكارية، ودارت زيارة بمختلف مرافق هاد التحفة الفنية اللي صمماتها المهندسة المعروفة عالميا الراحلة زها حديد.

مسرح على مساحة 7.1 هكتارا، منها 25 ألف و400 متر مربع مبنية. وكاين حدا ابي رقراق وبجوار برج محمد السادس الاعلى فافريقيا.

المسرح الملكي فيه قاعة كبيرة كتهز 1800 متفرج، وتتميز بتصميم فريد قائم على واجهات هندسية مميزة ومبتكرة للجدران والسقف. ويمكن لهذه القاعة احتضان أنواع متعددة من التظاهرات الفنية والثقافية (المسرح والرقص والباليه والأوبرا والمسرحيات الموسيقية، والحفلات السيمفونية والفيلارمونية، بالإضافة إلى أشكال أخرى من العروض الحية). يعني تفحة فنية كتبين مغرب جديد زوين. كلشي فيه حديث ومتطور. اضاءة وهندسة صوتية وسقف متحرك كيأخذ شكل عاكس صوتي.

هاد التدشين كان حضرو فقط الوزير المنتدب لدى وزيرة الاقتصاد والمالية المكلف بالميزانية، فوزي لقجع، ووالي جهة الرباط-سلا-القنيطرة عامل عمالة الرباط، محمد اليعقوبي، ورئيس مجلس الجهة، رشيد العبدي، ورئيسة المجلس الجماعي لمدينة الرباط، فتيحة المودني، ورئيس مجلس عمالة الرباط، عبد العزيز الدرويش، وعدد من الشخصيات الأخرى. ما كانش وزير الثقافة محمد بنسعيد. هادي بوحدها اشارة قوية.

وزير الثقافة والشباب والاتصال ما حضرش.

هاد الوزير اللي كيهتم فقط بامور اخرى غير الثقافة فشل من اكتوبر لليوم يوجد موديل اقتصادي لهاد المسرح الرائع٬ كيفما فشل يبدع اسلوب تدبير بالمسرح الكبير بالدار البيضاء. فلوس كثيرة كتخسر شهريا لضمان لونتروتيان بلا فائدة.

هاد لوزير اللي مدور بيه صحابو الفاشلين فابداع حلول للثقافة ولهاد المسارح٬ فلت على بلادنا مناسبة كبيرة بحال تنظيم حفل قرعة “الكان 25″ يوم غدا الاثنين فهاد المسرح وعليها غادي يتنظم فمسرح محمد الخامس بالرباط.

غير على هادي راه خاصو يحشم على عراضو ويجمع صحابو ويمشي فحالو من الوزارة.

تصورو هاد المسرح الملكي كون حتاضن القرعة٬ كان غادي يعطي صورة واعرة بزاف لبلادنا. ما يمكنش لمسؤولين مغاربة كيخدمو باش يجيبو احداث رياضية كبيرة للبلاد كيف كيدير فوزي لقجع رئيس الجامعة والوزير المنتدب المكلف بالميزانية وهاد بنسعيد مربع يديه ما كيدير والو. فاشل حتى يخلي هاد المعالم اللي بغاهم سيدنا يخدمو. مستشاروه كانو كيقولو ل”كود” باللي الوزارة ما عندها علاقة بالتدشين. ها سيدنا آمر بالتدشين ديال المسرح الملكي بالرباط وكلف الاميرة لالة حسنا ودابا هادي 3 اشهر تقريبا وباقي المسرح مسدود. راها مسؤولية كاملة للوزير بنسعيد.