كود : جمال العبيد//

معرفتش علاش المغاربة لي ساكنين فالفيسبوك معجبهومش مداخلة الوزيرة الحقاوي فالبرلمان لي قالت فيها أن المغرب مبقاش فيه الفقر. راه الوزيرة ما قالت غير الصراحة. المغرب راه ماشي بلد الفقر والفقراء.

المغرب ولله الحمد راه برزقو وخيرو وخميرو وماخصو حتى خير. كيفاش المغرب غادي يكون بلد الفقر والفقراء وهو فيه الفوسفاط وجوج بحور أما الثروات الفلاحية فحدث ولا حرج وعين الحسود فيها عود. وهاد شي كلو كيعني أننا خصنا نعتذرو من الحقاوي على الردود الغاضبة لي انتشرت في الفيسبوك بسباب المداخلة المعلومة.

المغاربة معاندهوش مشكل مع الفقر، المغاربة عندهوم مشكل مع التفقير. الأول ديال الله أما الثاني من صنع البشر وماشي أي بشر، البشر لي من مصلحتو يفقر الناس باش هو يبقى عيش فوق فكيك وماخصو حتى خير.

المغرب راه ماشي بلاد الفقراء، المغرب راه بلاد التفقيريون يعني دوك لي كينهبو الثروات وكيهربوها للخارج وهادو هوما لي قال بنكيران فحاقهم عفى الله عما سلف حيت ميقدر عليهم غير لي خلقهوم أمام بنكيران معاندو حتى سلطة على هاد النوع ديال البشر.

وطبعا التفقير هو سباب البلاء فهاد الوطن السعيد. التفقير هو المسؤول على وجود شريحة واسعة من المغاربة كتعيش يوميا بأقل ما يكون. وهو المسؤول على الأمية وأزمة التعليم. كيفاش بغيتي بنادم يسيفط ولادو للمدرسة ويضمن ليهم الرعاية اللازمة وهو عايش عيشة الدبانة فالباطانة. والتفقير هو لي كيخلي بناتنا يمتاهنو الدعارة الراقية فقبائل البترودولار والتفقير هو لي خلا السياح الباحثين على الزوامل والقحاب يتقاطرو على المغرب من مختلف بقاع العالم. وهاد شي كلو غير من بابت التمييز بين الفقر والتفقير ليس إلا..