الرئيسية > آراء > كيفاش المغرب بدل لعبو مع المانيا وفرانسا واسبانيا؟ ولى كيلعب فتيرانهم ودار اتفاقيات استراتيجية مع اللي ضدهم فالاتحاد الاوربي بحال بولونيا وهنغاريا واللي فاوربا بحال بريطانيا
09/12/2021 09:00 آراء

كيفاش المغرب بدل لعبو مع المانيا وفرانسا واسبانيا؟ ولى كيلعب فتيرانهم ودار اتفاقيات استراتيجية مع اللي ضدهم فالاتحاد الاوربي بحال بولونيا وهنغاريا واللي فاوربا بحال بريطانيا

كيفاش المغرب بدل لعبو مع المانيا وفرانسا واسبانيا؟ ولى كيلعب فتيرانهم ودار اتفاقيات استراتيجية مع اللي ضدهم فالاتحاد الاوربي بحال بولونيا وهنغاريا واللي فاوربا بحال بريطانيا

كود هناء ابو علي ///

المغرب غادي وكيبين قوتو. بطريقة ذكية ما فيهاش لعجاج والصداع. غير بالسكوتي. البارح واليوم بين باللي لاعب فنادي الكبار وما بقاش راضي بدورو للي كان كيلعبو فالسابق. ما بقاتش تخلعو المانيا ولا فرانسا ولا اسبانيا.

هاد الشي جا بالتدريج. بدا فدجنبر مع اعتراف ترامب بمغربية الصحرا واللي جا فيها اتفاق ثلاثي مغربي اسرائيلي اميركي. بدات العلاقة مع اسرائيل وماشي كيف السابق. ولات واضحة. فظرف قياسي تقوات بزاف. هاد الجايحة خلاتها تفراني شوية ولكن فهاد المدة زارنا وزير الخارجية ثم وزير الدفاع. توقعات اتفاقيات وموميراندوم على التعاون الاستراتيجي والامني.

هاد التحول خلى المغرب يثيق فراسو. الثلاث واليوم لاربعا وقعات ماشي جوجت الاحداث ولكن ثلاثة كتبين علي هاد التحول.

المانيا البارح وما ادراك ما المانيا خرجات بيان كتنفي فيه شي تقرير استخباراتي عبرات فيه على تخوفها من دور كبير للمغرب وشبهاتو بتركيا فمنطقتها. كذبات هاد الشي وهدرات على مواضيع اخرى منها رغبتها فعودة العلاقات الديبلوماسية اللي مقطوعة بين الرباط وبرلين هادي مدة.

هاد البيان تزامن مع حدث مهم البارح دارو المغرب. الرباط ولات كتلعب فالملعب الاوربي. فملعب الاتحاد الاوربي. ناصر بوريطة وزير الخارجية والتعاون لعب فبودابيست الكورة مع وزراء خارجية بولونيا والتشيك وهنغاريا وسلوفينيا. المناسبة كان انعقاد انعقاد الاجتماع الوزاري الأول لـ “مجموعة فيسغراد+ المغرب”.

بوريطة قال فندوة فهاد الاجتماع باللي “المغرب وشركاءه داخل مجموعة فيسغراد يحدوهما عزم قوي على تعزيز تعاونهما من أجل مواجهة التحديات المشتركة، لاسيما في مجال محاربة الإرهاب، الهجرة غير الشرعية والجريمة العابرة للحدود”.

وزراء خارجية هاد الدول شكرو محمد السادس والتزامو بالنهوض بقيم السلام “الاستقرار والعيش المشترك.  وبعد التعبير عن تمسكهم بمكانة المغرب كشريك استراتيجي بالنسبة للاتحاد الأوروبي، جددوا التأكيد على التزام مجموعة فيسغراد بمواصلة الدفاع عن مصالح المغرب داخل التكتل”.

الرسالة واضحة من الرباط. مشات عند اللي دابا كيشكلو معارضة قوية لبرلين ولباريس داخل الاتحاد الاوربي. فيهم رؤساء يمينيين وعندهم سياسة صارمة ضد الهجرة ولكن معنا بشكل من الاشكال فقضية الصحرا.

هاد التجمع ديال اوربا الشرقية ما كيرضاش بهمينة المانيا وفرنسا ودول اخرى على مؤسسات الاتحاد الاوربي. هنا المغرب دخل ولعب. لعب فتيرانهم.

الحدث الثاني اللي فيه اهمية اكبر. هي “الدورة الثالثة للحوار الإستراتيجي المغربي البريطاني”. هنا المغرب لعب فاوربا. مشى عند بلاد دارت لبريكسيت وخرجات من هاد الاتحاد. دولة عضو دائم فمجلس الامن الدولي.

فالاعلان المشترك كنلقاو عبارات سبق شفناها فاجتماعات المغرب بالديبلوماسييين الامريكيين. كتحس باللي بريطانيا قريبة بزاف للاعتراف بمغربية الصحراء.

بريطانيا جزيرة ومحتاجة لدولة فالاطلسي خارجة على اوربا. ما كاينش ما حسن من المغرب. وممكن يكونو اتفاقيات كبيرة ودور الحركة الاقتصادية ويتقوى التبادل التجاري خاصة بعد بدء العمل فميناء الداخلة.

المغرب كيقول لالمانيا وحتى لاسبانيا وفرانسا بدرجة اقل٬ راه عندي اوراق نلعب بيهم. اوراق من عندهم فالقارة الاوربية.

طبعا هاد الشي تخطيط استراتيجي ولعب كبير ماشي تحركات هاداك لخفيف ناصر بوريطة. هاداك واجهة وصافي

موضوعات أخرى