الرئيسية > آراء > كيفاش المغاربة لي كيقولو أنهم محافظين ولاو يبيعو حياتهم الخاصة فاليوتوب مقابل الأدسنس؟
10/02/2019 16:00 آراء

كيفاش المغاربة لي كيقولو أنهم محافظين ولاو يبيعو حياتهم الخاصة فاليوتوب مقابل الأدسنس؟

كيفاش المغاربة لي كيقولو أنهم محافظين ولاو يبيعو حياتهم الخاصة فاليوتوب مقابل الأدسنس؟

محمد سقراط – كود//

شحال هادي كتمشي تدق على صاحبك يخرج يلعب معاك كتحل ليك الأم ديالو غير النص ديال الباب ونتا خاصك ترجع اللور وماتلوحش عينك فالدار لداخل باش متسماش بركاك، وحتى الى دخلتي لدار شي حد خاص تدخل ديريكت للصالون ماتبقاش تدور فعينيك، وكانو الديور محصنين من المتطفلين والبراني، وملي كتدخل شي حد لداركم أو العكس داك الساعة راه بحال خوك، وكانو أماكن مثلا مقدسة عمرك تشوفها واخا كاع تقدر تكون من العائلة البعيدة، منهم بيت النعاس وحتى الكوزينة هادشي فالأحياء الشعبية، دابا الوقت تبدلات ووليتي تلقى فيديوات فاليوتوب ديال الطواليطات وبيت النعاس وأي قنت من الدار للأم ديال صاحبك لي كانت كتحل الباب غير نص حلة.

المغاربة لي كيقولوت أنهم محافظين ولاو كيبيعو حياتهم الخاصة فاليوتوب مقابل الآدسنس، هادشي زوين أن بزاف ديال النسا لي مكانت عندهم حتى مهنة أصبح عندهم دخل ولو يكون بسيط ولكنه كيعاونهم فالحياة الزوجية، ربات بيوت منتجات، ولكن لي غريب هو كيفاش تحول داك الزوج المغربي لي تزوج وحدة مخداماش وبزاف منهم معندهمش شهادات مدرسية، يعني الفكرة كانت أنه تزوج مرة ديال الدار، وهادشي لي كيقول أغلبهم ولكن غير بداو هاد النسا يدخلو الصرف من اليوتوب كتلقى الراجل وللى كول وكيدعم مرتو ومابقاش عندو موشكيل مرتو تصور ليهم بيت النعاس وتعرضو على الحبوبات، لدرجة المشاهد غادي يجيب ليه الله أن كاع المغاربة كوبلات حداثية متنورة، وكاع الرجال المغاربة كول وكيدعمو عيالاتهم فالإخيارات لي بغاو.

والحقيقة أن الرجل المغربي” ولد الشعب” محافظ إلى كانت عندو العاقة لي يقدر يهز بيها الدار بوحدو، وحتى المرأة المغربية ” بنت الشعب” هاكة الى لقات هاد الراجل وبزاف على بحال هذا كيقلبو، وإلى كان غير مقاتل مع الزمان ويالله جايب التعادل وهاز راسو وباغي يتزوج، هنا كيولي حداثي وكيآمن بالمناصفة وبحق المرأة فالشغل ويدعمها فتنويع مصادر الدخل أو فشي مشروع، فاللخر القضية فيها غير الصرف معندها علاقة لا بمحافظة ولا بحداثة، تصاور بيت النعاس لي كيتعتابر مكان جد شخصي ألى كانو يجيبو الصرف فماشي موشكيل الله يسهل، وحتى الغدا مع النسيبة والعشا مع اللوسة وخرجة للعروبية وروتيني الصباحي روتيني المسائي، تاواحد مكيبقى عندو موشكيل مع الكاميرة ويتصور ألى كان عارف أن الصرف داخل.

موضوعات أخرى

21/04/2019 12:00

ميكروطروطوار گود. أسباب الطلاق في عيون المغاربة: المعقول والنية والحب مبقاش.. والمرا كتشوف فالراجل المصباح السحري والراجل كيشوف فيها الجنس

21/04/2019 10:00

اللي كيدفع باستقلال نزار بركة راه كيوجد بنعرفة جديد. لبلاد معاه غادية تشعل دبصاح والدوباج غادي يرجع بومزوي