كود –وكالات//

بينات جوج دراسات علمية، تْنْشَرات فمجلات طبية على تأثير الفولار بالنسبة لجلدة الراس والشعر، مجلة Scientific Reports التابعة لمجموعة Nature دارت أول دراسة فالعالم اللي قارنت بين الميكروبيوم ديال فروة الرأس بين المحجبات واللي ماشي محجبات، الدراسة بينات بلي الفولار فعلاً كيأثر على البيئة البكتيرية ديال فروة الراس، وأن العيالات المحجبات أكثر عرضة باش يتقاسو بالتهاب الجلد الدهني (Seborrheic Dermatitis).

اشترطت الدراسة أن المشاركات فمجموعة الحجاب يكونو لابسينو على الأقل 8 ساعات فالنهار لمدة 5 سنين على الأقل، واستعملو تقنية التحليل الجيني  (NGS) باش يحللو عينات من القشرة ديال الراس، النتائج بينات أن نوع معين من البكتيريا S. capitis كان أكثر عند المحجبات، أما بكتيريا  S. cohnii كان أكثر عند لي ماشي محجبات، وبالنسبة للفطريات،M. restricta  كانت منتشرة كثر عند المحجبات، مقابل  M. globosa عند لي ماشي محجبات.

وكيشرحو الباحثين هاد الفروقات بأن تغطية الرأس بشكل مستمر كتنقص التهوية وكتزيد الرطوبة والحرارة، وهادشي كيخلق بيئة مختلفة لنمو الكائنات البكتريرية.

أما مجلة Journal of the American Academy of Dermatology فمراجعة علمية على تساقط الشعر (Traction Alopecia)  عند العيالات المحجبات، استعرضات فيها 25 دراسة علمية مرتبطة بالموضوع، وخرجت المراجعة بلي مشطة coiffures tirées  اللي كيديروها بعض العيالات تحت الفولار هي السبب الرئيسي فهاد النوع من الصلع.

ووضحَت الدراسة أن هاد المشطات كاتسبب ضغط على بصيلات الشعر، وكتأثر على ترطيب الجلد، ومع ضغط الفولار وجميع الشعر، كترتفع احتمالية تساقط الشعر بشكل باين.