كود – وكالات //

الصين ولات خدامة بزاف على واحد المجال جديد سميتو “البشر الرقميين”، اللي هما شخصيات كيتصاوبو بالذكاء الاصطناعي وكيبانُو بحال البشر الحقيقيين، وحتى ممكن يقلدو ناس ماتُو ،هاد الشي ولى كيتستعمل فالتسلية والتسويق، وحتى فحالات عاطفية بحال الناس لي مات لهم شي  حد عزيز.

على سبيل المثال واحد المراة شينيوة دارت نسخة رقمية ديال باها اللي توفى، وولات كتهضر معاه أونلاين، وكتقول بللي هاد التجربة عاوناتها شوية باش يخفاف عليها الضيم، ولكن فالمقابل، بزاف ديال الناس والخبراء خايفين من هاد الظاهرة، حيث ممكن تخلي الناس ما يتقبلوش الفقدان ديالهم ويبقاو مرتبطين بشخصيات ماشي حقيقية.

السوق ديال هاد “البشر الرقميين” فالصين كيكبر بسرعة كبيرة، ووصل الملايين الدولارات،وهاد الشي خلا الحكومة تدخل باش دير قوانين وتنظيمات جديدة، خصوصا فاش كيتستعمل “التزييف العميق” (deepfake).

من بين هاد القوانين، خاص الشركات توضّح واش المحتوى مصايب بالذكاء الاصطناعي، وما يستعملوش صور ولا معلومات ديال الناس بلا موافقتهم، وزيد عليها منع محتوى اللي يقدر يضر بالمجتمع أو الأمن.