كود – وكالات //

بيّنات واحد الدراسة أوروبية جديدة بلي كاين واحد الظاهرة عند طْيور فالساحات العمومية كتحْير، هاد الكائنات عندها بحال شي “رادار داخلي” كيخليها تميّز بين الراجل والمرا، وكتبدّل التصرف ديالها حسب الجنس ديال الشخص اللي قرّب ليها.

القصة بدات من ملاحظة اللي بزاف ديال الناس كيعرفوها من حياتهم اليومية ،ملي كتدوز شي مرا حدا طير فالزنقة ولا فالجردة ، كيطير دغيا ولكن الراجل غالباً كيقدر يقرب حتى لمتر ولا كثر، بلا يهرب ابكير، هاد السلوك اللي كيتعاود بزاف شدّ انتباه الباحثين وخلاهم يديرو دراسة ميدانية موسّعة.

الدراسة شملات 37 نوع مختَلف من طيور فـ5 دول أوروبية، ، الباحثين حيدو جميع العوامل اللي ممكن تأثر، بحال الطول، لون الحوايج، النظاظر، وحتى الشعر الطويل ،وخا هكاك  بقى الفرق باين فطريقة تفاعل الطيور مع الرجال والعيالات.

حتى لدابا ما كاين حتى تفسير علمي باين لهاد الظاهرة ،كاينين غير فرضيات كيقولو يمكن الطيور كتلاحظ اختلافات خفيفة فطريقة المشي، ولا فالشم بسبب الروايح ومواد التجميل او الفرمونات، ولا حتى فطبقة الصوت ،ولكن حتى وحدة من هاد الفرضيات ما تبتات .

الظاهرة ماشي غير عند الطيور حتى دراسات أخرى على الثدييات ورّات باللي الفيران فالمختبر كيبانو عليهم الستريس ملي كيتعاملو معاهم باحثين رجال مقارنة مع العيالات، وهاد الشي كيبين باللي هاد القدرة على التمييز بين الجنسين ممكن تكون صفة فـعالم الحيوان .