كود-وكالات ///

كشفات مجموعة من التقارير والأبحاث الطبية  اللي خرجات فـ2025 و2026 أن الوصول للأوركازم، خصوصاً عن طريق الاستثارة الخارجية أو العادة السرية، يقدر يعاون بعض العيالات فالتخفيف من آلام وتشنجات الدورة الشهرية.

وحسب مراجعة علمية تنشرات فمنصة PubMed Central (PMC) ففبراير 2025، فالأوركازم كيدفع الجسم يفرز مواد طبيعية بحال الإندورفين والأوكسيتوسين.

وكيعتابر الإندورفين من المسكنات الطبيعية ديال الجسم، بحيت انه كينقص الإحساس بالألم وكيخلي الجسم يتحملو أكتر ، أما الأوكسيتوسين فكيعاون على ارتخاء عضلات الرحم والحوض من بعد الانقباضات اللي كترافق الأوركازم، وهاد الشي يقدر يخفف من حدة التشنجات عند بعض النساء.

وفأبريل 2026، خرج تقرير طبي راجعوه مختصون فأمراض النساء والتوليد، وأكد أن الأوركازم كيرافقو حتا إفراز الدوبامين إلى جانب الإندورفين والأوكسيتوسين.

وكيشرح الخبراء أن الدوبامين كيساهم فتحسين المزاج والشعور بالراحة، بينما كيساعد الأوكسيتوسين على تنقيص التوتر العضلي فمنطقة الحوض، وهو ما يقدر يخفف الإحساس بالألم خلال فترة الحيض.

ولكن واخا هاكاك ،  شدد التقرير على أن الاستفادة كتختلف من مرا لأخرى، وماشي كاع لعيالات كيحسو بنفس النتيجة.

ومن بين الدراسات اللي جلبات الانتباه كاينة دراسة “Menstrubation”، اللي تابعات 486 مشاركة من دول مختلفة.

ووفق هاد نتائج اللي تنشرات ف 2025 و2026، كالت 42% من المشاركات إن العادة السرية المصحوبة بالأوركازم كانت من بين أكثر الوسائل اللي نفعاتهم فالتخفيف من آلام الدورة الشهرية، بينما أكدت 85% منهن أن شدة وتكرار الآلام نقصات مع مرور فترة المتابعة.

وكيعتقد الباحثون أن هاد النتائج مرتبطة بالتأثير المشترك ديال الإندورفين والدوبامين والأوكسيتوسين، وهي مواد كيفرزها الجسم بشكل طبيعي أثناء الأوركازم، وكتلعب دور فالتخفيف من الألم وتحسين الحالة النفسية وإرخاء العضلات.

ولكن واخا هادشي كامل، كيأكد الباحثون أن الأدلة العلمية الحالية مازال ما وصلاتش لمرحلة اعتبار الأوركازم أو العادة السرية علاجاً طبياً بديلاً للمسكنات أو للأدوية اللي كيوصفوها الأطباء، ومكينصحوش بالإيلاج في هاد لحالة حيت اقدر ادير التهابات خطيرة .