كود الرباط —-

في جامعة كرة القدم يظهر ان هناك تدجين لغالبية الأُطر، طارق الناجم الكاتب العام ما قادرش يحل حتى فمو، عندما سألته “كود” بخصوص قيمة العقد الجديد بين الجامعة الملكية لكرة القدم واتصالات المغرب دور راسو بحال شي تلميذ خجول وكسول.
من بدية الندوة والصباغة دايرة، باش تعرفو لبلاد مشات، تدخلت قائمة بلعوشي، ماشي بصفتها الصحافية بل بصفتها مقدمة ومنشطة. كلشي مخلط فهاد لبلاد. بلعوشي كالت الشعر فاحيزون. طبعا هو اللي مخلص.

احيزون تحدث على البركة وعلى تقديم الشركة ل325 مليون درهم طيلة العشرين سنة. وباش يبان وطني، كال باللي كيعاون المنتخب وما عمرو طلب النتائج. هدرة خاوية طبعا السيد مقولب جامعة.

من بعد جا لقجع وحتى هو عطاها غير لكلام الفارغ، كال كلشي الا ثمن الصفقة وعلاش مع اتصالات المغرب وماشي شركة اخرى

جابو الصحافة واللاعبين والمسيرين وحتى واحد ما عرف ثمن الصفقة ولا واش البطولة بصاح تحمل اسم “ماروك تلكوم”.

هاد الاجوبة غادية تلقاها كود فمسؤول فالجامعة شجاع وكيدافع على العقد “دابا راه العقد قيمتو 160 مليون درهم طيلة خمس سنوات؟ واش ماشي قليل على إعطاء اسم البطولة لاتصالات المغرب؟ “هاد الشي كان فالعقد اللي سالا وثانيا راه تزاد ب10 بالمائة وايلى قارناه ببطولات مشابهة وحتى بحال البرتغال راه عقد مزيان”، يوضح المصدر ل”كود”.