وكالات//

واخ “التيك توك” كيروج أنه غادي يمسح أي فيديو عندو علاقة بالانتحار، إلا أن الواقع شي آخر، وأي واحد فتح التطبيق وكتب كلمة انتحار في خانة البحث غادي يطلعو ليه العشرات ديال الفيديوهات ولي البعض منها وصل لملايين المشاهدات.

جورنال التايم البريطاني دار تحقيق على الموضوع وقال إن فيديوهات الانتحار موجودة على التيك توك، وأغلبيتها كتقدم نصائح على كيفية الانتحار، وطرق سهلة للانتحار، وأدوات سهلة للانتحار.

المصدر قال إن بعض الفيديوهات كتعطي نصائح للناس توريهم كيفاش يستعملو الأدوات المنزلية البسيطة وحتى السموم لي كاينة في الدار ولي فعالة باش ينتحرو، وهاد الفيديوهات جايبة عدد مشاهدات فايت المليون.

وتجنب التحقيق باش يكتب العبارات الكاملة والدقيقة ديال البحث في “تيك توك” باش ما يستعملوهاش الناس، ولو من باب الفضول باش يوصلو لهاد الفيديوهات لي كتندرج في خانة إيذاء النفس.

من جهتها، وكرد على التحقيق قالت شركة ByteDance الشينوية لي كتبت في تطبيق “تيك توك” أن العاملين فيها معتكفين باش يراجعو مصطلحات البحث والطريقة لي كتبان فيها مقترحات في عمليات البحث في التطبيق.

متحدث باسم الشركة قال بأن الناس لي خدامين في “التيك توك” كيخدمو مع جمعيات عالمية لمناهضة أذى النفس باش يحدو من المحتوى لي عندو علاقة بالانتحار، ويمنعو نشر هاد الفيديوهات من أصلو.