وكالات//

تسحبات جوج عطور ديال المغنية العالمية ريهانا من محلات “سيفرز” فبريطانيا، بعدما تبيّن أن بعض الدفعات فيهم مواد كيميائية ممكن تأثر على خصوبة المرأة وعلى نمو الجنين.

العطور اللي تشدو فهاد القرار هما كيس وريري، حيث لقاو فبعض الدفعات ديالهم مواد ممنوعة فبريطانيا وفالاتحاد الأوروبي من عام 2022، بسبب المخاطر اللي ممكن تديرها للصحة الإنجابية.

المتجر أكد أنه أي واحد يرجّع العطر غادي يرجّعو ليه الفلوس كاملة. ووضّحات الشركة أن السحب كيعني غير دفعات محددة، ونصحات الزبناء اللي ما متأكدينش من العطر ديالهم يتواصلو مع المتجر باش يعرفو واش داخل فهاد الاستدعاء ولا لا.

وحسب الشركة، بعض العطور فيها مكونات ممنوعة بحال “هيدروكسي إيزوهيكسيل 3 سيكلوهكسين كاربوكسالدهيد” و“بوتيل فينيل ميثيل بروبيونال‘‘.

الخبراء كيقولو هاد المواد داخلة فواحد المجموعة اللي كتأثر على الهرمونات ديال الجسم، وقد تكون مرتبطة بأمراض بحال السكري والسمنة، ومشاكل فالنمو والإنجاب، وحتى اضطرابات فالغدة الدرقية.