الرئيسية > آراء > كون مكانتش التسجيل عبر الأنترنيت مكنتش غادي نتسجل وبسباب الحملة ديال الأحرار في الانترنيت صوت عليهم لأنهم صوت المستقبل والقطيعة مع الفكر ديال واليدينا واهدافهم في الحياة دار يسدوها عليهم وحجة بمقام النبي وتقاعد مخير يدوزوه غادين جايين للجامع
09/09/2021 10:00 آراء

كون مكانتش التسجيل عبر الأنترنيت مكنتش غادي نتسجل وبسباب الحملة ديال الأحرار في الانترنيت صوت عليهم لأنهم صوت المستقبل والقطيعة مع الفكر ديال واليدينا واهدافهم في الحياة دار يسدوها عليهم وحجة بمقام النبي وتقاعد مخير يدوزوه غادين جايين للجامع

كون مكانتش التسجيل عبر الأنترنيت مكنتش غادي نتسجل وبسباب الحملة ديال الأحرار في الانترنيت صوت عليهم لأنهم صوت المستقبل والقطيعة مع الفكر ديال واليدينا واهدافهم في الحياة دار يسدوها عليهم وحجة بمقام النبي وتقاعد مخير يدوزوه غادين جايين للجامع

محمد سقراط-كود///

هاد العام أول مرة تسجلت وصوت في الانتخابات، أهم سبب خلاني نتسجل هو الموقع، تسجلت وأنا كالس في الدار وسيفطو ليا البلاصة فين غادي نصوت فميساج فتيليفون، كون كان غير خاصني نمشي نتسجل فالمقاطعة والمقدم والصف وداك الربيج مكنتش غادي نتسجل، التسجيل من الأنترنيت وداكشي ديال طلب الوثائق من الأنترنيت راها نعمة حقيقية وهي المستقبل، أنا ساكن في حي القرويين بفاس حي ديال الطبقة الوسطى فيه الموظفين والبياعة والشراية والوداديات والعساسة والزماكرة، مثلا الدار فين ساكن طبقة فيها خاوية ديال مهاجر كيجي غير في الصيف، الدار لي جنبي حتى هي هكاك، وأغلب الديور ديال الملاك، يعني تلاتة ديال الطبقات كتلقى ساكنين فيهم أسرة وحدة فيها شي ربعة ديال الأصوات، لذا حنا ماشي حي مهم إنتخابيا وحتى المرشحين ممسوقينش ليه، من نهار بدات الحملة ورقة وحدة لي لقيتها تحت الباب ديال مرشح دالإتحاد الإشتراكي، أما في الغالب كيدوزو يفرقو الوراق فير في الشوارع الرئيسية، وطبعا ماشفت حتى مرشح أو عرفتو أو تلاقيتوا أو شي حد جا دق عليا في الدار، مكاينش هادشي فهاد أحياء الموظفين، وحتى المرشحين كيتجنبوهم حيت فيهم قوة القرنابي، فاش كنت ساكن في حي شعبي راه كل دقيقة يدق عليك مرشخ غير تحليه الباب يبوسليك راسك ويسلم عليك بحال الى مناسب معاه، تما المرشحين كانوا مهتمين بالناخبين هنا أخاي ممسوق لينا تاواحد في الواقع، هاد الحومة كلها موحال تكون فيها ربعمية صوت بينما تقدر تلقاها فزنقة في بنسودة أو عين السمن أو زواغة، بحال فاش كنت ساكن في مراكش كان وشي فنادق في باب دكالة فيهم كثر من مية صوت وسير نتا دور في كيليز ماتجمعش حتى جوج أصوات بينما دوار الكرعة دريبة تحسم ليك الانتخابات.

بما أنني أول مرة غادي نصوت الصراحة كنت كنحس بصوتي ثمين وعندو قيمة وخاص نفكر مزيان قبل مانعطيه لشي حد مايستاهلوش، البرلمان كنت حاسم فأنني غادي نصوت للأحرار، ولكن الجماعات الصراحة كنت كنقول علاش لا مانصوتش على شي حد لي بصح يصلح الأمور هنا، ولكن للأسف ماقدرت نتعرف حتى على شي مرشح أو وصلاتني شي خبار عليه مزيانة، وفاش دخلت للصفحات الفايسبوكية ديال فاس، كنلقاهم كيهدرو على أغلبية المرشحين بأنهم إما فاسدين أو فاشلين وبالحجة والدليل، فقط الشباب ديال الاشتراكي الموحد وفيديرالية اليسار هوما لي كانو كيهدرو عليهم مزيان وكانو حاضرين حتى في الانترنيت، وطبعا مصوتش ليهم واخا كنتقاطع معاهم في بزاف ديال الأفكار ولكن معنديش معاهم لأسباب أخرى، وبما أنني تسجلت في الانترنيت وخدام فيه فطبعا الحزب لي غادي نصوت ليه هو لي يستهدفني عبر الانترنيت، لذا صوت على الأحرار، أولا فين مكنت كنبغي نتفرج في الخراز فيوتوب أو ولد آسفي لي كيدور افريقيا بالبيكالة كان كيخرج ليا أخنوش إنسان بشوش وباينة فيه ولد الناس وولد الخير وغادي يروجها وتروج معاه، كذلك في الفايسبوك وخصوصا داك المقال ديال محمد سقراط الصراحة قنعني فيه بأنه صحاب العاقة معاهم الخير، على عكس السياسيين لي ضيعو علينا خمسين عام فابور وتزادوهم المعلمين حتى هوما.

الموشكيل هنا أنا كناخب يمكن التأثير عليه عبر الأنترنيت راه كنتقام غالي بزاف مقارنة بالناخبين لي كيشدو الفلوس أما بحال الواليدين ديالي راه فابور، الواليدة كتصوت للعدالة والتنمية وبلا فلوس بلا طمع أولا لأنهم الناس ديال الله حسب قولها بحال الى لخريين ديال ابليس، وتانيا بالنسبة ليها راه الفضل فأنها ولات قادرة تقرى القرآن وتتواصل عبر واتساب ونكتب ليها وتقرى وتفهمني هو دروس محو الأمية لي كتدار في الجوامع ولي كانو كيقريوهم حجابيات ديال العدالة والتنمية والصراحة بفضلهم تعلمات الواليدة تقرى وتكتب لذا راه صوتها تقريبا أبدي ليهم، الواليدة أهم وثيقة حصل عليها في حياتو ولي باقي محتافظ بيها وكيجبدها مرة مرة بكل فخر هي بطاقة الإنخراط في حزب الإستقلال فشي السبعينات، وهو الحزب ديالو وحزب عائلتو وحزب الأصول الصحراوية الركيبية ديالو، من غير الإستقلال الى لقى مرشح لي قريب للساكنة وفوقاش مابغاوه يلقاوه كيصوت عليه وهذا هو المبدأ باش غادي وبحالو كثار.

كون مكانوش الأحرار في النسخة ديال هاد العام طبعا، كنت غادي نصوت على  التقدم والإشتراكية حزب كيعجبني كيجيني أنيق ونقي، وديما المرشحين ديالهم في البلايص لي كنت كنكون ساكن فيها كنلقاهم ناس قاريين وحتى الناس لي تلاقيت من هاد الحزب في الواقع كانو ناس تيق فيهم وتصوت عليهم، وهذا كيبقى غير انطباع عاطفي مامبنيش على شي أسس ومعندو علاقة بالسياسة، ولكن هاد العام كنت كنحس بأن الأحرار في نسخته الحالية هو حزب الشباب قدنا، حزب فيه الفايقين والعايقين ولي عندهم خطط للمستقبل وحارين ماشي منونخين، ولأول مرة حسيت بلي واجب عليا أنني نمشي نصوت على بنشعبون لي صرفقهم بمليار كاش في صندوق النقد الدولي، وعلى العلمي وعلى أخنوش هادو علامن صوت وكون كانو فحزب آخر كنت غادي نصوت عليهم، وكنتمنى ينجحو وتوقع القطيعة مع الفكر ديال واليدينا واهدافهم في الحياة دار يسدوها عليهم وحجة بمقام النبي وتقاعد مخير يدوزوه غادين جايين للجامع، هذا وقتنا حنا باغين نبقاو غير كاريين ولكن نتساراو ونعيشو مزيان وناكلو ونصورو الفلوس ونحطو السطوريات ونسافرو لبرة ونباتو فلوطيل مانباتوش عند العائلة.

موضوعات أخرى

23/09/2021 22:21

عاجل.. سالا الكلام: عمدة الرباط داتها اسماء اغلالو والاجتماع فدارها باقي مسالاش بحضور الطالبي وأوزين وها كيفاش كولشي تحسم

23/09/2021 20:30

عاجل. مرشح الاشتراكي الموحد فـ الناظور ريب “الحفلة”.. الطعون ديالو طيحات مكتب البلدية ومرشح لرئاسة المجلس الإقليمي – أحكام

23/09/2021 19:30

رئيس الحكومة الإسبانية: دابا كنتسناو تشكيل الحكومة الجديدة.. وقدامنا فرصة كبيرة باش نرجعو العلاقات المزيانة مع المغرب