گود سبور//

ما قدرش المنتخب النگليزي يربح الدنمارك اليوم الخميس، برسم الجولة الثانية من دور مجموعات كأس أوروبا، واخا الأسماء والنجوم النگليزية الكبيرة.

وسالا الماتش بين النگليز والدنمارك بالتعادل الإيجابي واحد لواحد، وما قدروش النگالزا بقيادة المدرب ديالهم گاريث ساوثگيت يخرجو رابحين وحتى المستوى ديال لاعبين النگليز كان متوسط بزاف لا يعكس تألقهم مع فرقهم.

وخداو النگليز والدنمارك من بعد هذا التعادل نقطة لكل منتخب، وكايحتلو النگالزا المركز الأول فالگروب 3 برصيد 4 نقاط، والدنمارك ثانيين مع سلوفينيا برصيد 2 نقاط لكن منتخب صربيا فالأخير بنقطة واحدة.

للإشارة فتوجه سؤال البارح الأربعاء لمدرب النگليز ساوثگيت، على شنو النصيحة اللي يقدر يعطيها للناخب الوطني وليد الركراكي باش يستغل إمكانيات اللاعبين اللي عندو فالمنتخب المغربي، وساوثگيت أكد فماتش اليوم الخميس بين النگليز والدنمارك أنه هو براسو خاصو اللي نصحو، باش يطور من مستوى النگالزا اللي كان حقق معهم المركز الرابع فمونديال 2018، ومن تماك مستواهم تراجع وما قدروش يديرو شي إنجاز جديد، واخا اللاعبين اللي عندو كايلعبو ففرق أوروبية كبيرة.