كود – عثمان الشرقي //

البارح  واحد العون من المكتب المغربي لحقوق المؤلف والحقوق المجاورة (BMDA) دخل لقهوة فتازة باش يدير معاينة، الهدف منها التأكد من احترام القانون المغربي المتعلق بحقوق المؤلف.

مول القهوة سي محمد، كان مخدم أغاني الفنانة فيروز لكليان ديالو كيف ديما فالصباح، حتى جاه العون لي حرّر محضر على استغلال الأغاني بلا ترخيص ،السيد محمد مول القهوة صرح :”هادي أول مرة نسمع بهاد القانون، إلا ما سمعناش لفيروز قالقهوة، لمن نسمعو متلا الواي واي ؟”

حسب القانون المغربي (القانون 2.00 و34.05)، أي قهوة أو محل مفتوح للعموم اللي كيستعمل موسيقى أو محتوى محمي خاصو يدفع حقوق سنوية للمكتب، الهدف منها حماية الفنانين وتعويضهم على استغلال أعمالهم فالأماكن العمومية،هاد النوع من القضايا ماشي جديد، حيث في السنوات الأخيرة توصلات بزاف ديال القهاوي والمطاعم بإشعارات من BMDA بسبب بث أغاني بلا رخصة، والخطية ط كانت بين 3000 و7000 درهم سنوياً.

رئيس الجمعية الوطنية لأرباب المقاهي، نور الدين الحراق، صرّح أن بعض الإشعارات كتعتبر تعسفية، وأن مالين القهاوي اقترحوا أداء مبلغ رمزي 200 درهم سنوياً لتشجيع الفنانين، لكن المكتب رفض. المهنيين مصرّين على اللجوء للمحاكم لتسوية الخلاف.

من جهة أخرى، بعض الناس عندهم آراء مختلفة واحد المتقاعد قال أنو كيعجبو يسمع الموسيقى فالقهوة مع صباح وما تحلاش ليه الكلسة إلا مع فيروز أو أم كلثوم، اما انوار  طالب جامعي صرح لكود : “القهوة بلاصة عمومية، وماشي معقول يفرضوا علينا أشنو نسمعو، الأماكن العمومية عندها قدسية، وداكشي علاش أنا مع هاد القانون.

القانون واضح فيما يخص احترام حقوق المؤلف، لكن النقاش باقي مفتوح بين مالين القهاوي  والمكتب المغربي لحقوق المؤلف على طريقة التطبيق والمبالغ المطلوبة،السؤال تاني  لي كيبقى مطروح واش الخطية غاتمشي للدولة ولا الفيروز؟