أميمة عطية كود كازا //
طالبت كونفدرالية نقابات صيادلة المغرب وزارة الصحة والحماية الاجتماعية باش تكشف على مشروع مرسوم مراجعة طريقة تحديد أثمنة الأدوية قبل ما تتم المصادقة عليه بشكل نهائي.
وفهاد السياق الكونفدرالية ديال نقابات صيادلة المغرب للي دارت حروب ضد الوزير التهراوي، ف ملفات كثيرة فاش حط يدو عليها باش يصلحها، بغات تطالع على تفاصيل المشروع وتقدم الملاحظات والاقتراحات ديالهم قبل اعتماده.
وأكدات الكونفدرالية، فهاد الصدد أنها سبق ليها راسلات الوزارة فهاد الموضوع في 28 شهر أبريل لي فات، تحت رقم A91401 وعبرات على الاستعداد ديالها للمساهمة فهاد الورش الوطني اللي عندو أبعاد صحية واقتصادية واجتماعية مهمة.
وزادت الهيئة المهنية، كالت أنها كتابع باهتمام كبير الأخبار المتداولة حول تقدم إعداد مشروع المرسوم، وكتشوف بأن من حق الهيئات الممثلة للصيادلة تطلع على مضامينه الأساسية قبل استكمال المساطر القانونية ديال اعتماده.
واعتبرات الكونفدرالية أن التشاور مع المهنيين وإشراكهم فصياغة الإصلاحات كيبقى من المبادئ الأساسية ديال الحكامة الجيدة، خاصة ملي كيكون الأمر مرتبط بقطاع حساس بحال قطاع الدواء.
وشددات على أن أي تغيير كبير فطريقة تسعير الأدوية يقدر تكون عندو آثار مباشرة على التوازن الاقتصادي ديال الصيدليات وعلى استمرارية الخدمات اللي كتقدمها للمواطنين، بل وحتى على مستقبل القطاع الدوائي ككل.
