عثمان الشرقي – كود //

مسرحية “صيام إجباري” كتعتبر آخر إصدار فني لفرقة أرتو للمسرح وفنون العرض من آيت أورير، واللي غادي يتفرج فيها الجمهور المراكشي فالعرض ما قبل الأول نهار السبت 6 دجنبر 2025، فالقاعة الصغرى ديال المركّب الثقافي الداوديات، مع السبعة ونص دالعشية. عرض كيجي فإطار مواصلة الفرقة لمسارها الإبداعي اللي كيراهن على المسرح كمجال للتجريب والبحث الجمالي.

هاد العمل كيعتمد على نص “كوميديا الأيام السبعة” ديال الكاتب العراقي عبد النبي الزايدي، وهو نص اللي معروف بذكاء السخرية ديالو وطريقة طرحو للأسئلة الوجودية بحسّ كوميدي مرّ. النسخة المغربية الدرامية تكلف بها الكاتب عبد المجيد ادهابي، اللي قدر يحافظ على الروح الأصلية ديال النص، وفنفس الوقت عطاه نفس جديد بلمسة مغربية كتقرّب الموضوع من الواقع المحلي، وكتخلي المتفرّج يعيش النص بطريقة أقرب وأكثر سلاسة.

من جهة الإخراج، الفنان مصطفى تاه تاه رجّع يسطّر حضور قوي فالساحة المسرحية من خلال رؤية إخراجية كتخدم النص وتفتّح ليه مساحات جديدة فوق الخشبة. الإيقاع، الحركة، وتوظيف الفضاء المسرحي كيعكسو احترافية وإتقان، وكيبرز مرة أخرى علاش تاه تاه واحد من الوجوه اللي عندها بصمة واضحة فالمسرح المغربي.

،النص الأصلي ديال “كوميديا الأيام السبعة” كيبقى واحد من الأعمال اللي قدرت تواجه الواقع بجرأة فكرية وسخرية واعية، وكتطرح أسئلة على الإنسان، السلطة، والوجود، بلا ما توقع فالشعارات أو المباشرة. تحويل هاد النص لنسخة مغربية عبر “صيام إجباري” إعادة كتابة كتفتح الجسر بين سياقين مختلفين، وكتبرهن أن المسرح ، وخا اختلاف البيئات، باقي قادر يخلق حوار إبداعي مشترك.