عفراء علوي محمدي- كود//
اللقاحات المضادة لكورونا برهنات على نجاعتها، باختلاف أنواعها، فمواجهة الفيروس، بحيث نسبة كبيرة من الدول اللي لقحات كثر من 70 فالمية من مواطنيها، بجرعة واحدة من الفاكسان على الأقل، قدرات تقلل بشكل ملحوظ من معدلات الوفيات فيها وأعداد الناس اللي كيدخلو للإنعاش بسباب الفيروس، والإصابات واخا كاينة إلا أن أغلب الحالات طفيفة وماشي خطيرة.
من هذ الدول اللي فادها تلقيح السكان الشامل، ولو بجرعة واحدة، كاينة الإمارات وسنغافورة وقطر والأوروكَواي والدنمارك والبرتغال، أما الدول اللي عندها عدد كبير من السكان وقدرات تسيطر على الوباء بفضل التطعيم كاينة كندا وبلجيكا وغيرها بزاف.
دول متحكمين فالوباء بعدما لقحو كثر من 70 فالمية (جرعة واحدة على الأقل)
مالطا كتعتبر أكثر دولة فالعالم ملقحة مواطنيها بجرعة وحدة على الأقل، بحيث دارت تطعيم بنسبة 92 فالمية من مجموع المواطنين اللي كيبلغ عددهم 500 ألف نسمة، ويوم الخميس 13 غشت تقاسو فيها غير 51 وماتسجلات حتى حالة وفاة، وكاينين 1137 كيتعالجو فالمجموع، وغير 4 اللي حالتهم صعيبة.
فنفس اليوم، الإمارات تقاسو فيها 1260، وماتو غير 4، عندها دابا 20 ألف كيتعالجو من كورونا، وحتى حد ماكاين فالإنعاش، والإمارات ملقحة 81,7 فالمية من سكانها بجرعة وحدة على الأقل، وكيبلغ عددهم 9 مليون.
آيسلندا ملقحة 89,6 فالمية من 300 ألف نسمة ديال سكانها، الخميس تقاسو فيها 120 ومامات حد، وغير 27 اللي كاينين فالإنعاش.
أما سنغافورة فحتى هي بدات تتجاوز كورونا، هذ الخميس تقاسو فيها غير 59، ومامات حد، وغير 1589 اللي كيتعالجو و9 فالإنعاش، سنغافورة ملقحة 76,3 فالمية من سكانها اللي كيبلغ عددهم 5 ملايين و704 ألف.
وقطر عاونها عدد سكانها القليل، اللي كيبلغو 2 مليون و832 ألف، باش تلقح 75,9 فالمية منهم، الخميس تقاسو فيها غير 197، ومامات حد، وعندها 2376 اللي كيتعالجو فقط، و24 فالإنعاش.
الأوروكَواي فيها 3 مليون منهم ملقخين 75 فالمية، كمعدل يومي مقيوسين فيها غير 124، وماتو 5، وفالمجموع 1513 كيتعالجو، و29 فالإنعاش.
الدنمارك ملقحة من سكانها 74,5 فالمية ، وكيبلغ عددهم 5 ملايين و806 نسمة، تقاسو فيها الخميس بكورونا 1085، وواحد مات، وفالمجموع 12510 كيتعالجو منهم 16 فالإنعاش.
البرتغال حتى هي بدات تتحكم فكورونا من بعد ما وصلات نسبة التلقيح فيها ل73,6 فالمية من 10 مليون مواطن برتغالي، بحال مثلا هذ الخميس، تقاسو فيها 2708 وغير 11 اللي ماتو، وفالمجموع عندها 44407 كيتعالجو وغير 169 اللي حالتهم صعيبة.
كندا كذلك متحكمة، بحيث ملقحة 72,4 فالمية من أصل 37 مليون، وهكذا نزلو الإصابات اليومية فيها ل2141، وماتو الخميس 4، وفالمجموع 14741 اللي كيتعالجو منهم 212 فحالة حرجة.
أما بلجيكا، ففيها 11 مليون مواطن بلجيكي، تلقحو فيهم 71,2 فالمية، والخميس تقاسو 2609، و3 ماتو، وكاينين 52 ألف اللي كيتعالجو فالمجموع، وغير 120 اللي فالانعاش.
دول وضعيتها صعيبة واخا لقحات 70 فالمية من السكان (بجرعة وحدة على الأقل)
لكن فالمقابل، مازال كتسجل الشيلي، وإسبانيا، والمملكة المتحدة، ارتفاع كبير فعدد الإصابات بالفيروس والوفيات، وهذشي راجع للتخفيف ديال هذ الدول، الكلي أو التدريجي، من قيود الحجر الصحي، وعدم احترام المواطنين للإجراءات الاحترازية، وخا جميع هذ الدول ملقحة كثر من 70 فالمية من السكان وهذي نسبة ماشي ساهلة.
وحتى نسبة السكان كيمكن تلعب دور، بحيث كيمكن للملاحظ يشوف أن الدول اللي عندها وضعية وبائية صعيبة كيفوت عدد سكانها 20 مليون نسمة، والى كانت دول فيها نسبة سكان كبيرة وقدرات تتحكم فأكيد لأن منظومتها الصحية متطورة وكتتوفر على بنية تحتية مزيانة وموارد بشرية متمكنة ساعداتها كثر من غيرها.
ومن بين هذ الدول اللي مازالة حاصة كاينة الشيلي، اللي لخميس تقاسو فيها عدد قليل اللي هو 1138 شخص، لكن ماتو ناس كثار وعددهم 86، ومازال كيتعالجو فيها 7962، و1023 فالإنعاش، هذشي والشيلي ملقحة 74,3 فالمية من السكان اللي كيبلغ عددهم علاين 19 لمليون.
السبليون حتى هي حصلات دابا وخا كانت عرفات تحسن قبل، 17410 تقاسو فيها، و87 ماتو، فالمجموع 717982 كيتعالجو، وهو ماشي رقم ساهل، و1921 فحالة حرجة، والسبليون اللي عندها 47 مليون ديال السكان ملقحة 73,1 فالمية.
وأخيرا كاينة المملكة المتحدة، اللي لقحات علاين 70 فالمية، أو تحديدا 69,5 فالمية، من أصل 66 مليون نسمة من سكانها فبريطانيا وخارجها، وواخا هكذاك، ماتو فيها الخميس 94، وتقاسو 32 ألف، ومازال مليون و302 ألف واحد كيتعالج، و871 فحالة حرجة، وهذي أرقام فعلا كتخلع.
واش أنواع اللقاحات كتدير الفرق؟
وكيبان أن نوع اللقاح ماشي هو السبب فهذ التفاوتات، بحيث كاينين دول كتستعمل نفس اللقاحات وماقدراتش تتحكم فالوضعية الوبائية بنفس الشكل بحال السبليون وكندا، اللي عدد سكانهم متقارب، وبجوج معتمدين على لقاحات فايزر/بيونتيك واسترازينيكا وجانسين، لكن كندا مابقاتش كتسجل حتى وفاة تقريبا، والسبليون كتسحل عشرات الوفيات فاليوم، كذلك الشأن بالنسبة لبريطانيا.
وكاين اللي خرج يشكك ففعالية لقاح سينوفارم اللي معتمدو المغرب، لكن الأرقام كتبيين أن الإمارات اللي معتمداه كلقاح رئيسي استطعات تتجاوز الوباء، فالوقت اللي دول معتمدة لقاحات أخرى حاصل، بحال الشيلي والبرازيل.
وممكن وضعية هذ الدول تتحسن من بعد ما تطلع نسبة الملقحين بشكل كامل (بجوج جرعات)، فالشيلي ملقحة غير 67 فالمية من سكانها بشكل كامل، والسبليون 62 فالمية، بينما المملكة المتحدة ملقحة بشكل كامل 59 فالمية.
وهذشي ماعندوش علاقة بنوعية اللقاحات اللي أغلبها معترف به من طرف منظمة الصحة العالمية، من بعد ما ثبتات نجاعتها بنسب عالية.
ترتيب الدول حسب نسبة تلقيحها الكامل لمواطنيها (بجرعتين)
ماكيختلفش بزاف ترتيب ونسب تلقيح الدول المذكورة لمواطنيها بالجرعة الثانية الأخيرة على تلقيحها ليهم بجرعة على الأقل، بحكم أن أغلبهم كيحاولو الإسراع لتطعيم جميع المواطنين، وكيركزو على تطعيم اللي فحاجة لجرعة ثانية أكثر من غيرهم.
وهذي نسب التلقيح الكامل للمواطنين فالدول المذكورة بالترتيب:
مالطا: 90,9 فالمية (401390 شخص)
آيسلندا: 74,8 فالمية (255 ألف شخص)
الإمارات: 72,7 فالمية (7 مليون و190 ألف شخص)
سنغافورة: 68,3 (3 مليون و990 ألف شخص)
الأوروكَواي: 68,3 (2 مليون و370 ألف شخص)
الشيلي: 67,4 (12 مليون و890 ألف شخص)
بلجيكا: 64,8 (7 مليون و510 ألف شخص)
قطر: 64,3 (1 مليون و870 ألف شخص)
البرتغال: 63,8 (6 مليون و510 ألف شخص)
كندا: 63,1 (23 مليون و820 ألف شخص)
الدنمارك: 63 فالمية (3 مليون و650 ألف شخص)
إسبانيا: 62,5 (29 مليون و220 ألف شخص)
المملكة المتحدة: 58,9 (40 مليون وألف شخص)
وكتبقى الصين هي الدولة اللي لقحات اكبر عدد من المواطنين اللي هو 223 مليون، كتجي بعدها ميريكان ب167 مليون ملقح، ثم الهند ب116 مليون ملقح.
والمغرب لحد يوم الخميس 12 غشت الساعة ملقح 43,4 فالمية من سكانو بجرعة واحدة على الأقل (16 مليون)، و30 فالمية بالنسبة للملقحين بشكل كامل (16 مليون)، وباش نوصلو للمناعة الجماعية كيخص على الأقل نفوتو النص.
المصادر:
https://ourworldindata.org/covid-vaccinations/
موضوعات أخرى
10 سنين د الحبس للمجرم الخطير “الزائر” وها تفاصيل باقي الأحكام
بوليس الطاليان شدو مغربي بسباب أنشطة محظورة مرتبطة بالإرهاب
