الرئيسية > آش واقع > كورونا. . ها هي الجهات الست اللي خصصات أغلفة مالية ضخمة لإعالة الأسر المعوزة والتعقيم
31/03/2020 18:35 آش واقع

كورونا. . ها هي الجهات الست اللي خصصات أغلفة مالية ضخمة لإعالة الأسر المعوزة والتعقيم

كورونا. . ها هي الجهات الست اللي خصصات أغلفة مالية ضخمة لإعالة الأسر المعوزة والتعقيم

عفراء علوي محمدي- كود//

بالإضافة لمساهمة مجالس الجهات فصندوق مواجهة جايحة “كورونا”، المجالس خصاصات غلاف مالي إضافي باش تحارب التداعيات ديال الفيروس، أغلبية الجهات حطات ميزانية ضخمة من أجل مساعدة الأسر اللي تضررات بشكل مباشر بعد الإعلان على حالة الطوارئ الصحية، بحال الأسر اللي المعيلين ديالها كيخدمو فخدامي غير نظامية وضطرو يتوقفو على الخدمة بسبب حالة الطوارئ الصحية.

مجموعة من الجهات مزال كتتدارس القرار اللي غتخرج بيه من أجل دعم أقاليمها، وكاينة اللي فضلات تدعم الأقاليم كذلك على مستوى التعقيم والتطهير للوقاية من انتشار الفيروس، ومساعدة عمال النظافة فهذ الظرفية، كذلك كاينة الجهات اللي عطات مساهمات فالجانب الصحي.

مجالس الجهات طبقات مقتضيات دورية وزير الداخلية عدد 1248 بتاريخ 25 مارس 2020، اللي حث فيها هذ المجالس باش يخصصو شي حاجة من الميزانية ديالهم لدعم الأقاليم اللي تابعين ليهم، من خلال تقديم مساعدات للأسر المعوزة وللمتضررين من هذ الوباء، والاعتماد على تجهيزات ومعدات من أجل التعقيم، ومن ضمن هذ الجماعات جهة فاس مكناس، وجهة طنجة تطوان الحسيمة، وجهة سوس ماسة، جهة الرباط سلا القنيطرة، جهة الداخلة وادي الذهب، جهة بني ملال خنيفرة

جهة فاس مكناس: خصصات أعلى ميزانية

مجلس جهة فاس مكناس كان هو اللول على مستوى قيمة الفلوس اللي عطى باش يدعم العائلات المتضررة، خصص 30 مليون درهم للأسر اللي فحالة هشاشة فهذ الفترة، وزعها على الأقاليم على حساب الكثافة السكانية ديالهم، بحيت خصص لفاس 6 ملايين درهم، ومكناس 4,6 مليون درهم، وتاونات 4,4 مليون درهم، وتازة 3,7 مليون درهم، وصفرو 2,6 مليون درهم، وبولمان 2,4 مليون درهم، والحاجب 2,3 مليون درهم، وإفران ومولاي عقوب 2 مليون درهم لكل منهما.

وصدر المجلس، البارح الاثنين، بيان، كيتكلم فيه على مستجدات الوضع الوبائي فالجهة، والإجراءات المتخذة بخصوص التعقيم والوقاية، بالإضافة للدعم الاجتماعي لما يحفظ كرامة المواطن، مع تجنب التوظيف السياسي.

جهة طنجة تطوان الحسيمة: اهتمات بإعالة الأسر كثر من التعقيم

مجلس جهة طنجة حتى هو خصص ميزانية باش يدعم العائلات المعوزة فالجهة، واللي كتزيد القيمة ديالها على 20 مليون درهم، وغيتم توظيفها من أجل دعم هذ الفئة بالمواد الغذائية الأساسية، وتزويد الجهة بادوات وآليات التعقيم والنظافة لمواجهة “كورونا”.

الجهة خصصات 16 لمليون درهم لدعم الأسر المعوزة، فالأقاليم بتمنية اللي مكونة منها الجهة، يعني بمعدل 2 مليون لكل إقليم، وغاتكلف بتوصيل هذ المساعدات للعسر بشكل مباشر، بينما خصصات 4 مليون باش تقتني معدات التعقيم، وتعاون مسؤولي القطاع الصحي فالجهة.

جهة سوس ماسة: اهتمات بدعم الأقاليم بالمواد الغذائية والتعقيم بالتساوي

نفس الغلاف المالي خصصاتو جهة سوس ماسة لدعم هذ الجهة، لكن بتقسيم مختلف، بحيت خصصات 10 مليون درهم لدعم الساكنة دالجهة بالمواد الغذائية اللي تحتاج، وخصوصا العائلات المعوزة اللي كاينة فالجهة، بالإضافة لتخصيص 10 مليون درهم للتعقيم والنظافة.

واهتمات الجهة بشكل كبير بجانب التعقيم، وشرات بتنسيق مع مصالح الخزينة الجهوية والمصالح الجهوية للصحة معدات تعقيمية جديدة ب200 ألف درهم.

جهة الرباط سلا القنيطرة: اهتمات بالتعقيم وخصصات جوج حافلات للمصابين ب”كورونا”

وبدورها، خصصات جهة الرباط سلا القنيطرة ميزانية ديال 20 مليون درهم باش تواجه “كورونا”، لكن اهتمات فقط بجانب التعقيم وشراء التجهيزات اللازمة لدعم التدابير الصحية المتخدة فهذ الظرفية.

وغادي توزع الجهة هذ المعدات التعقيمية على جميع الأقاليم والمدن اللي مكونة ليها، وهي الرباط، وسلا، والصخيرات، تمارة، والقنيطرة، والخميسات، وسيدي سليمان، وسيدي قاسم.

وبالإضافة لهذشي، خصصات الجهة جوج حافلات دارتهم رهن إشارة الاطر الصحية فصبيطار مولاي عبد الله فسلا، اللي كيتعالجو فيه المصابين بكورونا.

جهة الداخلة وادي الذهب: خصصات 25 ألف قفة للمعوزين

مجلس جهة الداخلة وادي الذهب حتى هو رصد غلاف مالي ديال 15 لمليون من اجل توفير 25 ألف قفة من المواد الغذائية الأساسية لفائدة الأسر المعوزة والفئات الهشة، وغاتوزع هذ القفات على الفئات المستهدفة هذ الأيام.

بني ملال خنيفرة: عطات 50 ألف حصة غذائية للأسر الهشة

أما مجلسة جهة بني ملال خنيفرة، فخصص 50 ألف حصة غذائية للأسر المعوزة والمتضررة من حالة الطوارئ الصحي بتراب الجهة.

ووضح المجلس بللي غايوزع هذ الحصص الغذائية على الساكنة بعموم تراب الجهة، ومازال يقدر يرصد مبالغ إضافية.

موضوعات أخرى

05/06/2020 08:00

المغرب خرج رابح من صداع استخدام الهيدروكسي كلوروكين فعلاج المصابين بكورنا.. 3 باحثين انسحبوا من دراسة “ذا لانسيت” لي فجرات جدل عالمي